Historike : Si ndërroi jetë para 44 vitesh hendbollisti Muharrem Gashi në Vishegrad të Bosnjës

Njëri ndër talentët më të mëdhenj të hendbollit gjilanas e Kosovar, Muharrem Gashi në moshën 23 vjeçare me 15 gusht 1978 në Vishegrad të Bosnjës kishte ndërruar jetë në një ndeshje miqësore të hendbollit.

Ish-hendbollisti Muharrem Gashi ishte student i vitit të tretë në Fakultetin Juridik në Prishtinë, poashtu ishte edhe anëtar i Kombëtares së Kosovës në hendboll. Gashi i cili konsiderohej njëri ndër hendbollistët më të mirë në Kosovë e më gjerë, ishte shumë afër të jetë edhe hendbollist i ish-Jugosllavisë por vdekja e mori mu në kulmin e karrierës së tij.

Në vitin 1978 KH Bozhur ishte anëtar i Ligës së Dytë të ish-Jugosllavisë, ndërsa përgatitjet kishin vendosur ti kryenin në qytetin e Vishegradit në Bosnje Hercegovinë. Pas tri ditësh përgatitjeve Bozhuri kishte vendosur të luante një ndeshje miqësore me Radniqkin e Gorazhdës, i cili poashtu ishte në përgatitje në këtë qytet.

Momenti kritik i kësaj ndeshje ishte minuta e fundit e pjesës së parë Muharrem Gashi merr një top gjuan fuqishëm në portën kundërshtare dhe plandoset në fushën e çimentos në gjendje kritike. Me gjithë përpjekjet e mjekeve dhe qytetit të Vishegradit nuk arritën ta shpëtonin ishte një humbje e tronditje e madhe për bashkëlojtarët dhe gjithë klubin e Bozhurit.

I tërë qyteti i Vishegradit ishte në pikëllim siç kanë bërë të ditur bashkëlojtarët e tij i madh e i vogël trupin e Muharrem Gashit e kanë përcjell me lot në sy.

Varrimi i ish-hendbollistit dhe talentit më të madh të hendbollit Kosovar në Gjilan, ishte bërë në mënyrë madhështore, i gjithë qyteti i Gjilanit e shumë qytetar anembanë Kosovës e ish-Jugosllavisë kishin ardhur ti japin lamtumirën e fundit. Për ish-hendbollistin gjilanas, Muharrem Gashi ishte gjuajtja dhe goli i fundit në karrierën e tij, buzëqeshja e gëzimi u zëvendësuan me lot e dhimbje./rajonipress/