Hipertensioni, shkaqet e paraqitjes dhe mbajtja e tij nën kontroll

Internistja dhe endokrinologia Venera Berisha-Muharremi këtë javë në emisionin “Shnosh e Mirë” në RTV Dukagjini, ka folur për hipertensionin.

“Kur zemra si pompë e hedh gjakun në enët e gjakut, ai gjak bën presion në muret e brendshme të enëve të gjakut dhe ky e krijon presionin apo shtypjen e gjakut. Kjo shtypje është e domosdoshme që gjaku të qarkullon nëpër enët e gjakut dhe të shpërndahet në të gjitha pjesët e trupit”, tregon doktoreshë Venera, përcjell Telegrafi.

“Arteriet e shëndosha, janë enët e gjakut të cilat e bartin gjakun me oksigjen në të gjitha pjesët e trupit. Për të qëndruar ato të shëndosha nevojitet që shtypja e gjakut të mbahet në vlera të caktuara”, thotë më tej doktoresha.

Endokrinologia tregon se ka mjaft gjëra që mund të bëhen për të mbajtur shtypjen e gjakut në vlera normale.

Vlera e lartë që paraqitet në aparatin matës të shtypjes së gjakut, është shtypja sistolike e cila tregon shtypjen e gjakut kur zemra pompon gjakun.

Ndërsa vlera e dytë e cila është më e ulët tregon shtypjen që bën gjaku kur zemra është duke pushuar në mes dy rrahjeve.

“Vlerat normale janë deri në 120 me 80 mm të shtyllës së zhivës [njësia matëse e shtypjes së gjakut]. Hipertension kemi atëherë kur shtypja e gjakut kalon shifrat 140 me 90 të shtyllës së zhivës. Kur shtypja është ne mes të 120 dhe 140 themi se ai person është në fazën e pre-hipertensionit”, shpjegon Berisha-Muharremi.

Ajo tregon tutje se hipertensioni si edhe sëmundjet tjera kronike, nëse njëherë shfaqet nuk mund të mjekohet më, mirëpo mund të menaxhohet shumë mirë nëse ndryshojmë mënyrën e jetesës dhe mund të parandalohet shfaqja e tij.

“Në shumicën e rasteve hipertensionit nuk i dihen shkaqet e paraqitjes. Po ashtu hipertensioni mund të jetë edhe i fshehur pa ndonjë shenjë të paraqitjes. Për këtë arsye quhet edhe si “vrasës i heshtur””, thotë internistja, duke shtuar se mungesa e aktivitetit fizik, dieta jo e shëndetshme, pirja e duhanit, konsumimi i tepërt i alkoolit, obeziteti dhe stresi janë ndër faktorët që ndikojnë në shfaqjen e kësaj sëmundje.

“Ka shumë dieta të suksesshme për menaxhimin e hipertensionit por më e rëndësishmja është kufizimi i konsumimit të kripës. Duhet që ajo të jetë nën 1.7 gram në ditë. Të zgjedhën yndryrërat e shëndetshme në ushqim, të merret sasi e mjaftueshme e perimeve, të kufizohen karbohidratet dhe të merren përmes pemëve”, tregon më tej doktoreshë Venera.

Berisha-Muharremi thotë se aktiviteti fizik duhet të bëhet tre deri në katër herë në javë në një periudhë prej 40 minutash dhe të jetë i intensitetit të moderuar për të parandaluar shfaqjen e hipertensionit.

Doktoresha këshillon për fund që të gjithë personave që tashmë iu është shfaqur hipertensioni, rekomandohet t’i marrin barërat ashtu siç u ka rekomanduar mjeku pasi “kjo nuk është një sëmundje që kurohet e më pas ndërpritet terapia”./Telegrafi/

Shpërndaje.
© RAJONIPRESS

Vërejtje!

RajoniPress.com nuk do të botojë shkrime që nuk i përmbushin kriteret dhe standardet profesionale të gazetarisë bashkëkohore. Nuk do të ketë për askënd mbyllje apo censurë, por jemi të fokusuar që në këtë agjenci, lajmi, shkrimi, raporti, intervista dhe opinioni të plotësojnë kriteret profesionale. Gjithashtu opinionet, analizat, komentet, nuk duhet të shkelin parimet etike (gjuhën e urrejtjes, fyerjet, diskriminimet e çfarëdoshme).