Hill: Ky është momenti kyç, është vështirë, por presim zbatimin e marrëveshjes

Ambasadori i Shteteve të Bashkuara të Amerikës në Beograd, Christopher Hill, tha sot se marrëveshja e Ohrit, si dhe marrëveshjet e tjera ndërmjet Kosovës dhe Serbisë nuk janë arritur lehtë, duke shtuar se ka ardhur momenti kur pritet zbatim konkret.

Në një deklaratë para gazetarëve në Valjevë, Hill tha se është arritur një moment kyç – zbatimi, të cilin e vlerësoi si një moment të vështirë.

“Sa i përket marrëveshjes së Ohrit dhe marrëveshjeve të tjera, nuk kam thënë për asnjë moment se ishte diçka e lehtë dhe se do të ishte e lehtë, por mendoj se kemi arritur një moment vendimtar në kuptimin që duhet të presim që diçka të ndodhë në aspektin e zbatimit. Ky është një moment i vështirë, por mendoj se është një moment plot shpresë. Ne presim zbatimin në të ardhmen”, tha Hill.

Hill shtoi se çështja e Kosovës duhet parë si çështje rajonale në kontekstin e Ballkanit të Hapur.

Siç thotë ai, në këtë iniciativë vendet e Ballkanit Perëndimor janë duke bashkëpunuar.

“Mendoj se kjo është pjesë e procesit që do ta çojë Serbinë drejt një bashkëpunimi më të madh dhe përfundimisht drejt anëtarësimit të saj në BE. SHBA-ja mbështet fuqishëm procesin e bashkëpunimit në kuadër të Ballkanit të Hapur dhe anëtarësimit në BE”, tha Hill.