Hetohet 3% i Qeverisë Bukoshi

Policia e Kosovës është duke hetuar fondin e 3 për qindëshit të Qeverisë në Ekzil që udhëhiqej në atë botë nga Bujar Bukoshi.

Burime të standardi.info mirë të konfirmuara brenda Policisë së Kosovës kanë thënë se “janë duke u hetuar të gjitha transaksionet e kryera nëpër bankat e mundshme që janë deponuar shuma të mëdha parash nga ky fond”.

Burimi bënë të ditur se hetimet kanë filluar nga të huajt, por që tash lëndën e kanë kaluar te vendorët.
“Tash me rastin po merren vendorët”, ka thënë burimi.

Po ashtu nga ky burim është konfirmuar se janë duke u intervistuar figura të rëndësishme që kanë pasur poste në kohën e Qeverisë në Ekzil.

“Të gjithë njerëzit që kanë pasur poste të rëndësishme në kohën e Qeverisë në Ekzil janë duke u intervistuar”.

I kontaktuar nga standardi.info ish- Kryeministri i Qeverisë në Ekzil Bujar Bukoshi ka thënë se “nuk ka asgjë të keqe nëse hetohet ai fond”.

Bukoshi është treguar i gatshëm që të bashkëpunojë me organet e drejtësisë nëse i kërkohet një gjë e tillë.

“Unë jam i gatshëm për gjithçka”.

Bukoshi nuk e dinë a është intervistuar ndokush nga kabineti i ish- Qeverisë së tij në Ekzil.

“Nuk e di a është merr dikush në pyetje, nuk kam ndonjë informacion”, ka thënë shkurt Bukoshi për standardi.info.
Zyrtarisht Policia e Kosovës nuk ka dashur të jap ndonjë përgjigje për rastin.

Njëri nga zëdhënësit e Policisë që nuk ka dashur t’i përmendej emri ka thënë se ka diçka në këtë drejtim, por që nuk mund të bëhet publike./