Hetemaj, optimisti i Chievos

Përparim Hetemaj mbetet optimist, me gjithë fillimin negativ të sezonit nga ana e Chievos. Ekipi nga Verona ka grumbulluar vetëm 10 pikë në 11 xhirot e para, duke përfunduar në pozitën e 16-të, shumë afër ekipeve të rrezikuara për të rënë nga liga. Por, kjo nuk e brengos fort futbollistin kosovar.

“Kemi 10 pikë dhe natyrisht nuk jemi në vend të fundit. Përballja me Udinesen do të na mundësojë të përgjigjemi menjëherë në fushë me një paraqitje pozitive. Kemi nevojë për pikë. Kjo mendoj se do të jetë ndeshje mjaft e rëndësishme. Sipas meje, nuk jemi shumë keq”, deklaroi përfaqësuesi finlandez për të përditshmen italiane ‘L’Arena’.

Në xhiron e fundit, Chievo humbi nga Milani. “Humbja nga Milani ishte e paevitueshme, edhe pse ata kishin fat në disa situata. Mjafton t’i shohim dy nga golat e pësuara. Por, ne nuk u dorëzuam asnjëherë. Skuadra edhe tentoi ta fitonte lojën, kur ishim në disavantazh prej dy golash”, vazhdoi ai. Për futbollistin drenicas nuk ka shumë rëndësi nëse luan apo jo. Për të më e rëndësishme është fitorja e ekipit.(express)