Hetemaj humb 10 mijë euro në minierë

Përparim Hetemaj, futbollisti i Chievo Veronës dhe kombëtares së Finlandës kohë më parë kishte investuar në një minierë në Finlandë si edhe shumë e shumë personalitet e kompani të ndryshme të këtij vendi, por duket se edhe ai si të tjerët ka bërë investime të gabuara.

Të gjithë ata që kanë investuar në minierën, Talvivaara janë në rrezik të humbjes së parave të tyre, ka raportuar ‘YLE’. Hetemaj ka investuar 10 mijë euro, ndërsa ndër investitorët e tjerë janë edhe ish-presidenti i shtetit të Finlandës, Saulii Niinisto, pastaj shefi i Nokias, Olli-Pekka Kallasvuo, ndërsa humbësi më i madh llogaritet televizioni publik dhe fondi i saj i pensioneve në vlerën e 4 milion eurove.

Ndryshe, Hetemaj vazhdon të jetë pjesë shumë e rëndësishme e skuadrës së Chievos. Ai ka vendosur të qëndrojë edhe më tutje në skuadrën nga qyteti i Veronës, ani pse i kishte disa alternativa për të ndërruar ambient në Itali.