Heshtja që rëndon mbi Gjilanin: Auditorët alarmojnë për shkelje serioze, opozita dhe institucionet mbeten pa reagim

Gjilan – Raporti i fundit i auditimit për Komunën e Gjilanit ka nxjerrë në pah një sërë shkeljesh serioze financiare, administrative dhe procedurale, por ajo që po shqetëson opinionin publik edhe më shumë është heshtja e opozitës, mungesa e reagimit institucional dhe pasiviteti i organeve të hetuesisë.

Pavarësisht gjetjeve alarmante të auditorit për keqmenaxhim financiar, vonesa të mëdha në pagesa, shkelje procedurale dhe probleme në administrimin e buxhetit publik, në skenën politike lokale pothuajse nuk po dëgjohet asnjë zë i fuqishëm opozitar që do të kërkonte përgjegjësi institucionale apo hetim të plotë të rasteve të evidentuara.

Një nga çështjet më shqetësuese mbetet pagesa e faturave me vonesa ekstreme, të cilat sipas raportit kanë kaluar deri në 120 ditë, ndonëse afati ligjor për pagesë është 30 ditë. Ekspertët financiarë paralajmërojnë se një praktikë e tillë krijon rrezik serioz për procedura përmbarimore, kamata shtesë dhe dëmtim të drejtpërdrejtë të buxhetit publik.

Në qarqet ekonomike po shtohet gjithashtu pakënaqësia e kompanive private që pretendojnë se Komuna nuk po i shlyen obligimet financiare me muaj të tërë. Megjithatë, pavarësisht dëmeve që mund t’u shkaktohen operatorëve ekonomikë, reagimet publike kanë qenë të vakëta, ndërsa shumë kompani po zgjedhin heshtjen përballë institucioneve komunale.

Njohës të zhvillimeve politike në Gjilan vlerësojnë se mungesa e një opozite aktive dhe mbikëqyrëse ka krijuar hapësirë për një qeverisje të mbyllur, arrogante dhe pa përgjegjësi publike.

Sipas tyre, opozita lokale ka dështuar të ushtrojë presion demokratik dhe kontroll institucional mbi pushtetin komunal, duke i lënë qytetarët pa alternativë dhe pa zë kritik përballë problemeve që po rëndojnë administratën lokale.

Po aq shqetësuese konsiderohet edhe mungesa e reagimit nga organet e hetuesisë dhe institucionet përgjegjëse për mbikëqyrjen e ligjshmërisë financiare. Në opinionin publik tashmë po shtrohen pyetje të drejtpërdrejta: pse nuk ka hetime konkrete për shkeljet e evidentuara nga auditori dhe pse institucionet kompetente vazhdojnë të heshtin përballë gjetjeve që konsiderohen serioze?

Raporti i auditimit ka ngritur dyshime të forta për menaxhim të dobët financiar dhe mungesë kontrolli institucional, ndërsa qytetarët e Gjilanit po kërkojnë më shumë transparencë, përgjegjësi dhe reagim nga të gjitha institucionet që kanë obligim ligjor të mbrojnë interesin publik.

Në një kohë kur Gjilani po përballet me probleme infrastrukturore, ngecje zhvillimore dhe pakënaqësi të shtuar qytetare, shumëkush po vlerëson se heshtja politike dhe institucionale po bëhet po aq e dëmshme sa vetë shkeljet e evidentuara në raportin e auditimit./rajonipress/