Haziri takon komunitetin romë, konfirmon angazhimin e tij për kushte më të mira për ta

Gjilan – Kryetari i Komunës së Gjilanit, Lutfi Haziri, së bashku me Komitetin për Komunitete dhe me Policinë në Bashkësi, kanë vizituar sot lagjen “Elez Agushi” dhe “Avdulla Presheva”, lagje këto në të cilat është i përqendruar komuniteti rom në Gjilan, për tu interesuar për gjendjen në të cilën jetojnë ata, kushtet infrastrukturore, gjendjen ekonomike dhe sociale por edhe kushtet në të cilat mbahet mësimi në gjuhën rome.

Kryetari Lutfi Haziri në fjalën e tij pas vizitës në këto lagje ka thënë se Komuna e Gjilanit në këto lagje do të investoj në infrastrukturën publike dhe njëkohësisht do të punoj edhe në zbutjen e gjendjes së rëndë ekonomike dhe sociale për disa familje.

“Kam vizituar sot banorët e dy lagjeve të qytetit, ku janë të përqendruar komuniteti romë, të cilat janë me gjendje të rëndë sociale e ekonomike dhe me papunësinë që është shumë e lartë. Në kuadër të banimit social, ne do të angazhohemi me Ministrinë për Kthim në veçanti, por edhe me ministritë e tjera dhe me buxhetin e Komunës, që ti balancojmë kërkesat dhe do të ndërhyjmë shumë shpejtë me ndërtim të shtëpive, infrastrukturës, kryesisht me ndriçim për shkaqe sigurie për të gjithë qytetarët pa dallime etnike”, ka thënë kryetari Haziri.

Kryetari Haziri ka thënë se Gjilani është Komuna e vetme që ka shkollën e cila mësimin e realizon në gjuhën rome.

“Jemi Komuna e vetme që mësimin për këtë komunitet e ka në gjuhën rome. Edhe parashkollorët por edhe klasat tjera ndjekin mësimet në atë shkollë. Është e papranueshme që fëmijët romë të mësojnë në ato kushte dhe gjendje aq të degraduar. Do të angazhohemi konkretisht për këtë komunitet që të kenë kushte më të mira në infrastrukturë, arsim, shëndetësi dhe punësim”, ka thënë mes tjerash kryetari Haziri.

Ai ka falënderuar edhe Policinë në Bashkësi, e cila ka dhënë një kontribut të jashtëzakonshëm në sigurinë e këtij komuniteti dhe bashkëpunimin në përgjithësi në të gjitha lagjet dhe fshatrat e Gjilanit.

Kurse, Fadil Demiroviq, përfaqësues i komunitetit romë, në Komitetin për Komunitete, ka thënë se vizita e kryetarit të Komunës në lagjet e romëve është një mbështetje për ta dhe shpresë për jetë më të mirë.

“Vizita e kryetarit të Komunës në lagjet ku banojnë komuniteti romë, është një shpresë për neve dhe besojmë se gjendja ekonomike dhe sociale do të nis me ndryshue për komunitetin tonë. Kemi shumë shpresa te kryetari Haziri dhe besojmë që do të bëjë një zgjidhje më të mirë për neve”, ka thënë mes tjerash ai.

Pas vizitës nëpër lagje të ndryshme, kryetari Haziri ka dëgjuar edhe hallet e tyre në një takim të përbashkët dhe njëkohësisht ka ofruar zgjidhje në bazë të prioriteteve për këtë komunitet.

Përndryshe, në këtë lagje bazuar në vlerësimin e rrezikshmërisë, do të rrënohen shtëpitë që janë të degraduara dhe rrezik për jetën e qytetarëve. /rajonipress/

Shpërndaje.
© RAJONIPRESS

Vërejtje!

RajoniPress.com nuk do të botojë shkrime që nuk i përmbushin kriteret dhe standardet profesionale të gazetarisë bashkëkohore. Nuk do të ketë për askënd mbyllje apo censurë, por jemi të fokusuar që në këtë agjenci, lajmi, shkrimi, raporti, intervista dhe opinioni të plotësojnë kriteret profesionale. Gjithashtu opinionet, analizat, komentet, nuk duhet të shkelin parimet etike (gjuhën e urrejtjes, fyerjet, diskriminimet e çfarëdoshme).