Haziri: Qeveria nuk guxon ta heshtë rastin e Zahirajve

Gjilan – Lutfi Haziri deputet në Kuvendin e Kosovës tha për rajonipress se problemi i lagjes së Zahirajve është i pa ndashëm nga problemi i Karaqevës së Epërme për shkak të ripërshkrimit të vijës kufitare njëanshëm nga Serbia pas ratifikimit të marrëveshjes Gligorov- Millosheviq.

Haziri tha se Zahirajt si pikë ndarëse janë afërsia më e madhe e kufirit serb me Moravën e Binqës. “Aspirata serbe është lumi Ibër dhe Morava e Gjilanit të jetë kufiri me Kosovën. Kjo është vija famëkeqe e ndarjes fashiste. Xhamija e Sllubicës apo lagja e Zahirajve, Ranatoci, Stanqiqi dhe tani edhe Karaqeva e Epërme janë vendbanimet që nxjerrin jashtë malet e Karadakut dhe Gollakut jashtë Kosovës”.

Sipas Hazirit zgjidhja sipas vitit 1956 e përcakton vijën ndarëse në Nasalc të Bujanocit dhe në Bugarin dhe trekëndëshi kufitarë zhvendoset në kufirin që zgjidhë problemet territoriale me Serbinë.

Haziri thotë se rasti i Zahirajve nuk guxon të heshtet e as të lihet pas dore.”Me Zahirajt duhet të merret Qeveria dhe mekanizmat e saj qoftë grupet e ekspertëve apo edhe institucionet tjera që merren ekskluzivisht me demarkacionin e kufirit Kosovë-Serbi”.

Kurse , Gani Neziri drejtor për kadastër dhe gjeodezi në Gjilan thotë për rajonipress se banorët e Zahirajve gjithmonë kanë qenë pjesë e Kosovës dhe ata të gjitha dokumentet i kanë të Gjilanit. “Zahirajt nuk mund të regjistrohen në Serbi sepse nuk janë banorë të atij shteti. Ata janë pjesë e Kosovës dhe si të tillë janë trajtuar gjithmonë. Tjetër është politika e Serbisë e cila gjithmonë dinë me provokua dhe me ngrit tensione” thotë Neziri.

Neziri tha se para tri vitesh i janë kërkuar nga Kuvendi i Kosovës dhe deputetët e Gjilanit të gjitha kopjet, fletat poseduese dhe hartat kadastrale të Zahirajve. “Të gjitha këto dokumente i kam dorëzuar në Parlament, por realisht kufijtë aktual të Kosovës janë të njohur ndërkombëtarisht dhe bashkë me këtë edhe ai në Zahiraj” tha Neziri.

Por kështu nuk mendojnë banorët e mbetur atje. Pajazit Zahiri banori i vetëm i mbetur në Zahiraj thotë se nuk është mirë që komuna po flenë e Qeveria po heshtë rreth definimit të vijës kufitare me Serbinë. “Unë nuk e di çka mendojnë ata politikanët tanë në Prishtinë, por këtu ku unë jam patrullon xhandarmëria serbe çdo ditë dhe ky territor llogaritet si pjesë e tyre. Unë nuk dorëzohem lehtë dhe jam i vendosur që të jetojë këtu në Zahiraj sepse kam një vendosmëri të madhe meqë aktualisht i kam 200 copë dele dhe po të kemi pak infrastrukturë këtu unë do të jetoja pa telashe” tha Zahiri.

Zahiri tha se nëse ky territor është i Kosovës pse atëherë Komuna e Gjilanit nuk e ndihmon këtë pjesë.”Unë kam nevojë për një stallë e cila kushton 3000 euro .Po të investohej në këtë projekt unë s`do ta braktisja kurrë vendlindjen. Edhe po të më injorojë shteti im , unë prapë do të jetojë këtu sepse ky vend gjithmonë ka qenë i Kosovës” tha Zahiri./rajonipress/