Haziri: Pas 1 dhjetorit gjilanasit më nuk do të shohin afera korruptive

Gjilan – Për ta bërë fitoren e Lutfi Hazirit edhe më spektakulare u përkujdesën edhe fshatrat: Përlepnicë, Kmetovc, Verbicë e Kmetovcit dhe Shillovë, të cilët kanë organizuar tubim madhështorë.

Në këtë tubim ishte i pranishëm veprimtari Isa Maliqi, deputetja Lirije Kajtazi, familjet e dëshmorëve të kombit Zija Shemsiut dhe Xhavit Ahmetit si dhe veprimtarë e aktivistë të Lidhjes Demokratike të Kosovës.

Tubimin e hapi përfaqësuesi i këtyre nëndegëve, Driton Rexhepi, i cili tha se është kthyer besimi i madh i qytetarëve në mbështetjen për LDK-në, duke e zgjedhur njeriun e dëshmuar, politikanin me përmasa ndërkombëtare – Lutfi Hazirin.

Para qindra të pranishmëve, fituesi i zgjedhjeve të 3 nëntorit, Lutfi Haziri, tha se pas 1 dhjetorit gjilanasit më nuk do të shohin afera korruptive.

“Pas 1 dhjetorit nuk do të shihni afera të korrupsionit. 3 nëntori na ka bërë me nderë, na ka bërë fitues të mëdhenj dhe ky besim përkthehet me punë, përgjegjësi, përkulje, respekt e falënderim. Arroganca e pushtetit, menaxhimi i keq i kuletës së popullit, klientalizmi partiak, humbja e vlerave që lidhet me familjen, me dëshmorët, pleqtë, gratë, të rinjtë e të rejat etj, ka bërë që populli të na jep besimin dhe për këtë ju falënderoj sinqerisht” pohoi kryetari Haziri.

Kryetari Haziri ka shtuar se i pari i qeverisë nuk ka alternativë tjetër, por t’i paguaj borxhet që i ka krijuar në komunën e Gjilanit.

“I pari i qeverisë mund të vije edhe 50 herë brenda javës, por s’ka alternativë tjetër: do t’i paguaj borxhet dhe do t’i paguaj borxhet. Askund nuk është investuar as për së afërmi me nevojat e qytetarëve. Krejt çka kanë bërë ata është harrnimi. Ata i kanë varfëruar familjet, ndërsa vetë janë pasuruar. Ne do ta ulim tatimin në pronë, taksën fillestare komunale etj. Ne poashtu do t’u ndihmojmë familjeve, duke u siguruar bursa dinjitoze për studentë, duke ua dhënë farën, naftën, plehun dhe korrjen falas. 50 për qind te buxhetit do ta ndajmë për bujqësinë”, është shprehur njeriu që e ktheu shpresën në Gjilan, Lutfi Haziri thuhet në njoftimin e degës së LDK-së në Gjilan./rajonipress/