Haziri: Paguam borxhe në vlerë të 2 milionë eurove

Gjilan – Nga të hyrat buxhetore janë paguar borxhe në vlerë 1985402 euro, shumë kjo që e rëndon buxhetin e këtij viti, ka thënë Lutfi Haziri, kryetar i Gjilanit.

Kreu i komunës së Gjilanit, Lutfi Haziri, ka thënë këtë të premte se komuna e Gjilanit ka vënë një disiplinë buxhetore dhe se po paguan borxhe për atë që të tjerët hëngrën vjet e parvjet.

Haziri tha se nga të hyrat buxhetore janë paguar borxhe në vlerë 1985402 euro, shumë kjo që e rëndon buxhetin e këtij viti. Haziri, tha se pagesa e borxheve po ka impakt në investimet e sivjetme, kurse qeverisjen e kaluar e ka cilësuar administratë të papërgjegjshme me borxhe të çuditshme.

“Ne kemi shpenzime të vogla dhe jemi në një dietë të ashpër”, ka thënë kreu i Gjilanit, Lutfi Haziri, që ka thënë se edhe qytetarët vazhdojnë t’i kenë borxh komunës së Gjilanit, dikur rreth 9 milionë euro. “Ne po mundohemi që mos të prekim kuletën e qytetarëve”, ka thënë Haziri, që ka shtuar se borxhet e qytetarëve ndaj komunës kanë mbetur në nivelin e njëjtë si më parë.

Haziri, ka thënë se presin shumë nga qarkorja buxhetore e 15 tetorit, ku pritet të përmirësohen kufijtë buxhetorë. Ai ka kërkuar që qeveria t’i kthejë Gjilanit 15 milionë euro. “Kushdo që t’a merr qeverinë Gjilanit duhet t’i kthejë këto të holla”, ka thënë Lutfi Haziri./rajonipress/