Haziri: Nuk do të ketë marrëveshje Kosovë-Serbi para zgjedhjeve në SHBA

Nënkryetari i Lidhjes Demokratike të Kosovës, Lutfi Haziri, ka folur për raundin e ardhshëm të takimeve mes Kosovës dhe Serbisë, përfshirë ato në Uashington e më pas në Bruksel.

Haziri është shprehur pesimist se mes Kosovës dhe Serbisë mund të ketë marrëveshje para zgjedhjeve në SHBA.

“Nuk besoj se do të ketë marrëveshje para Nëntorit. Unë i kam humbur shpresat. Kjo për shkak se iku muaji Gusht. Po të kishte ndonjë takim atëherë kur edhe u shtye, e një tjetër më pas në Bruksel, mbase Shtatori do të ishte muaji i Kosovës, por tash nuk besoj”, tha mes tjerash Haziri në Kanal10.

Më 4 shtator do të mbahet takimi mes delegacioneve të larta të Kosovës dhe Serbisë në Shtëpinë e Bardhë në Uashington.

Takimi është njoftuar nga emisari special i SHBA-ve për dialogun, Richard Grenell dhe në të pritet të finalizohen marrëveshje ekonomike.