Haziri: Me hapjen e rrugëve të reja, po iu mundësojmë qytetarëve qarkullim më të lehtë

Gjilan – Kryetari i Komunës së Gjilanit, Lutfi Haziri me bashkëpunëtorët, ka vizituar sot punimet në hapjen e rrugëve në lagjen “Fidanishte”, te “Livadhet e Arapit”, “Dheu i Bardhë” dhe rrugët tjera qytet.

Kreu i Gjilanit tha se është shumë i kënaqur që qytetarëve të Gjilanit, me investimet në infrastrukturë, po iu mundësohet një qarkullim më i lehtë, pasi tashmë po hapen rrugët që janë të domosdoshme.

“Po i vazhdojmë investimet në infrastrukturën bazike gjithandej territorit të Komunës. Në këto lagje ka qenë e domosdoshme të hapen rrugët e reja sepse në këtë mënyrë po u mundësojmë qytetarëve qarkullim më të lehtë dhe më të mirë, sikurse që po parandalohet kaosi në komunikacion. Në disa lagje jemi në fazën e shtrimit me zhavor e më pas asfaltimi, ndërkaq në shumë lagje të tjera jemi në fazën e fundit të punimeve, në asfaltimin e rrugëve”, u shpreh Haziri.

Kryetari Haziri ka pohuar se me dinamikë edhe më të madhe do të vazhdojnë t’i realizojnë projektet infrastrukturore sipas planit të paraparë./rajonipress/