Haziri: LDK dallon 100 % në program me partitë e tjera

Gjilan – Kryesia e Lidhjes Demokratike të Kosovës, Dega në Gjilan, ka mbajtur sot mbledhjen e parë me kandidatët e nominuar për këshilltarë në Asamblenë Komunale, të kryesuar nga kryetari i degës dhe kandidati për kryetar komune, deputeti Lutfi Haziri.

Në këtë takim u vlerësua lartë performanca e këshilltarëve aktual në Asamblenë Komunale, derisa kryetari Lutfi Haziri ka shprehur bindjen se këtyre këshilltarëve do t’i bashkëngjiten edhe shumë këshilltarë të tjerë në mënyrë që Lidhja Demokratike e Kosovës të jetë forca numër 1 pas zgjedhjeve të 3 Nëntorit.

Duke e quajtur listën e Lidhjes Demokratike të Kosovës listë fituese, Haziri ka folur edhe për përfaqësimin e gruas në listën zgjedhore të partisë. “Ju kemi nominuar që të jeni këshilltarë të pozitës. Ju jeni lista e fitores në zgjedhjet e 3 nëntorit. LDK e vlerëson shumë edhe rolin e gruas në shoqëri dhe lista jonë fituese është e përfshirë në numër të madh edhe nga aktivistet femra, të cilat janë secila më eksperte se tjetra”, ka thënë, ndër të tjera, Haziri.

Kryetari i ardhshëm i Gjilanit ka kërkuar nga asambleistët e ardhshëm punë të madhe në terren, për ta mbrojtur votën e lirë, që në zgjedhjet e fundit u keqpërdorë shumë në dëm të LDK-së. “LDK dallon 100 % në program me partitë tjera dhe nuk kemi dilemë në fitoren tonë të madhe. Duhet të jemi syçelë dhe të vëmendshëm për ta mbrojtur votën e lirë, që është kusht esencial i demokracisë, e që partia në pushtet e keqpërdori në mënyrë flagrante. Do të dalim në teren shtëpi për shtëpi, në secilin fshat, në secilën lagje, për t’u ofruar qytetarëve programin tonë të fitores”, ka thënë Haziri./rajonipress/