Haziri: Ftesa e Isa Mustafës për mua është ftesë për ta fituar Gjilanin

Gjilan – Lutfi Haziri kryetar i degës së LDK-së në Gjilan i cili në takimin e fundit që pati me Isa Mustafën në Gjilan, ku edhe mori mbështetje nga rinia e Gjilanit dhe vet lideri Mustafa për ta udhëhequr Gjilanin tha për rajonipress se është i përkushtuar që ta respektojë vullnetin e qytetarëve dhe të votuesve të LDK-së për një Gjilan më të mirë.

Lutfi Haziri tashmë i ka hequr të gjitha dilemat dhe ka ndërmend që të kandidojë për kryetar të Gjilanit në zgjedhjet e ardhshme lokale. Haziri këtë motiv e ka mbështetur edhe nga përkrahja e të rinjve gjilanas të cilët në takimin e fundit ku mori pjesë edhe Isa Mustafa kërkuan që Lutfi Haziri të kandidojë për kryetar të Gjilanit.

Haziri i kontaktuar nga rajonipress përmes telefonit ka shpalosur edhe motivin edhe qëllimin e tij për të qenë kandidatë për zgjedhjet e ardhshme. Haziri i cili ndodhet në Washington për vizitë zyrtare dhe më pas edhe në Bruksel tha se është motivuar nga kërkesa e të rinjve gjilanas për t`i hyrë garës për ta fituar Gjilanin.

Haziri ka përfolur diskutimin e Isa Mustafës para të rinjve të LDK-së në Gjilan se “nëse ju të rinjtë dhe anëtarësia e LDK-së dhe qytetarët e kërkojnë Lutën për kryetar të Gjilanit ne jemi të gatshëm ta kandidojmë Lutën si përfaqësuesin tonë më të mirë në Kuvend”.

Haziri thotë se është i përkushtuar që ta respektojë vullnetin e qytetarëve dhe të votuesve të LDK-së për një Gjilan më të mirë, me vizion e qëllim zhvillimor. “Kriza e borxhit publik që e ka fut kjo qeverisje e keqe e Gjilanit është e keqja më e vogël se kriza morale e politike për qytetin tonë. Gjendje depresive në pamundësi zhvillimore” ka thënë Haziri.

Sipas Hazirit borxhi prej 3.3 milion eurove joligjore, përjashtimi i Gjilanit nga rruga e kombit, rritja e qirasë komunale dhe gati falimentimi i biznesit të vogël e familjar e deri tek ndërhyrja në rrogat e arsimtarëve e shërbyesve civil pa të drejtë, janë një motiv shtesë që të bëhet pjesë e së mirës për ta ndryshuar këtë gjendje të katandisur në të cilën ndodhet Gjilani . “Nga këto dukuri shqetësuese dhe që janë elemente e prova për çdo hetim, Gjilani ka nevojë për ndryshim dhe koha po vjen. LDK-ja në Gjilan është emblemë që do të adresojë zgjidhje konkrete e me afate kohore që garanton daljen nga kjo gjendje. Unë realisht ftesën e Isa Mustafës për kandidaturën time e marrë si ftesë për mua që ta fiton Gjilanin” tha Haziri./rajonipress/