Haziri apelon për kursim të ujit: Ende jemi larg kuotës që duhet ta ketë penda e Përlepnicës

Gjilan – Kryetari i Komunës së Gjilanit, Lutfi Haziri, ka vizituar sot kompaninë regjionale të ujërave Hidromorava, për t’u informuar me gjendjen që është sa i përket furnizimit me ujë të pijes për qytetarët e Gjilanit.

“Jemi këtu për të përcjellur nivelin e menaxhimit të situatës emergjente të thatësisë që Gjilani është që nga muaji qershor i vitit të kaluar. Furnizimi me ujë të pijes është çelës primar për shërbimin ndaj qytetarëve, por me angazhimin e përbashkët do të menaxhohet kjo situatë. Kërkohet nga qytetarët që ta shfrytëzojnë me kujdes ujin vetëm në amvisëri, por jo edhe në sektorë tjerë siç janë autolarjet, ujitjet në bujqësi apo shfrytëzimi për ndërtimtari. Në vazhdimësi, inspeksioni komunal do të merret me monitorim të shfrytëzimit të ujit, sepse më e rëndësishmja është që amvisëria të jetë e furnizuar me ujë”, ka thënë Haziri.

Ai ka njoftuar se sot është mbajtur takimi për negocimin e kontratës me koncesionerin për impiantin dhe tretmanin e ujërave të zeza në Gjilan, konkretisht me BERZH-in dhe kompanitë implementuese.

Haziri njoftoi se po punohet edhe në projektin me Bankën Botërore që ka si qëllim zgjidhjen e problemit të ujit të pijshëm për periudhë afatgjate për Gjilanin.

Ndërkaq, drejtori i KRU Hidromorava, Muhamed Suliqi, ka njoftuar se qytetarët janë duke u furnizuar me ujë të pijshëm nga burimet si Guri Hoxhës, Baja, burimi në Velekincë dhe dy puset alternative afër FSK’së me kapacitet të plotë, ndërkaq niveli i pendës së Përlepnicës ka arritur në 18 metra.

Ndërkohë, Elhame Ramadani, kryetare e Bordit të KRU Hidromorava, ka apeluar të gjithë qytetarët që të kenë kujdes maksimal në shfrytëzimin e ujit të pijshëm.

“Ende nuk jemi në atë pikë në të cilën mund të themi se jemi mirë sa i përket kapacitetit të furnizimit nga penda”, tha ajo./rajonipress/

Shpërndaje.
© RAJONIPRESS

Vërejtje!

RajoniPress.com nuk do të botojë shkrime që nuk i përmbushin kriteret dhe standardet profesionale të gazetarisë bashkëkohore. Nuk do të ketë për askënd mbyllje apo censurë, por jemi të fokusuar që në këtë agjenci, lajmi, shkrimi, raporti, intervista dhe opinioni të plotësojnë kriteret profesionale. Gjithashtu opinionet, analizat, komentet, nuk duhet të shkelin parimet etike (gjuhën e urrejtjes, fyerjet, diskriminimet e çfarëdoshme).