Haxhiu: Kushtetuesja me çdo kusht dëshiron ta mbajë në pushtet Hashim Thaçin

Lëvizja Vetëvendosje e quan të padrejtë vendimin e Gjykatës Kushtetuese, e cila i jep të drejtën vetëm PDK’së për të propozuar kandidatin për kryetar të Kuvendit.

Albulena Haxhiu, thotë se Gjykata Kushtetuese me çdo kusht po tenton ta mbajë në pushtet liderin e PDK’së Hashim Thaçi.

“Në bazë të vendimit të padrejtë të Gjykatës Kushtetuese, pra Gjykata Kushtetuese ka thënë që vetëm PDK’ja e ka të drejtën për të propozuar kryetarin e Kuvendit, pra e lidh grupin parlamentar me numrin më të madh të votave, pra në zgjedhjet e 8 qershorit. Sipas kësaj, është lënë një hapësirë në pikën 126 dhe 127 ku thuhet që nëse nuk zgjedhet kryetari i Kuvendit nuk do të thotë se duhet shkuar në zgjedhje dhe që mbetet në vullnetin e deputetëve në bazë të marrëveshjes që ta zgjedhin kryetarin e Kuvendit”, tha Haxhiu për RTV21.

Sipas saj, PDK nuk do të mund të zgjedh kryeparlamentarin, pasi nuk i ka numrat.

“PDK nuk i ka votat për ta zgjedhur kryeparlamentarin, pavarësisht që Gjykata Kushtetuese me çdo kusht po dëshiron që ta mbaj në pushtet Hashim Thaçin. Është evidente që nuk i ka numrat për ta bërë pasi duhen 61 deputetë të votojnë për atë, nuk i ka pra, nuk i ka të siguruara as minoritetet e lërë më të subjekteve tjera megjithëse po bëhen deklarata ose propaganda të tilla që kinse ka blerë deputetë e gjëra të tilla. Unë uroj, që mos t’ketë ndodhur kështu. Përfundimisht nuk do të zgjidhet kryetari i Kuvendit nga PDK’ja”, tha Haxhiu.