Haxhi Krasniqi, me hapa të sigurt drejt titullit të kampionit botëror

Haxhi Krasniqi iu kthye ringut pas 10 muajsh duke e mposhtur polakun Bartomiej Grafka të shtunën e kaluar me vendim unanim të gjyqtarëve.

Boksieri junikas kishte humbur prillin e vitit të kaluar nga Arthur Abraham, ndërkohë që dy herë ishte sfidues i titullit të kampionit botëror.

Tash Krasniqi ka rrugë të vështirë përpara për ta realizuar ëndrrën, e cila është titulli i kampionit botëror.

Dhe, promotori i boksit Ulf Steinforth beson se boksieri kosovar me nënshtetësi gjermane mund t’ia dalë mbanë në peshat super të mesme.

“Për Krasniqin ishte hera e parë që boksoi që nga humbja e prillit të vitit të kaluar nga Arthur Abraham. Tash ka nevojë për praktika të tjera me luftëra dhe duhet të ndihet përsëri mirë në ring. Ndër të tjera, fitorja e tij kundër një kundërshtari të vështirë dhe të pakëndshëm është mjaft e mirë”, shprehet Steinforth.

Krasniqi tash do të punojë për meçin e radhës, të cilin gjithsesi se do ta zhvillojë sivjet, për t’iu afruar edhe më shumë titullit të kampionit botëror. /Zëri/