Hawking merr çmimin 3 milionë dollarësh për astrofizikë

Sipas Hawking, shumë zhvillime shkencore në fushën e fizikës nuk merren në konsideratë për çmimin Nobel për shkak se vërtetimi i teorive është shumë i vështirë.

Shkencëtari i njohur i fizikës astronomike Stephen Hawking ka fituar çmimin më të lartë shkencor në botë. Ai është lauruar të merkurën në Gjenevë me çmimin që peshon 3 milionë dollarë “Fundamental Physics Prize”.

Shkencëtari i hendikepuar britanik e ka marrë çmimin personalisht, i shoqëruar nga e bija. Ai me këtë rast ka deklaruar se ndjehet shumë i nderuar.

Çmimi i lartë i është dhënë Hawkingut, veç tjerash për zbulimin e rrezatimit të zgavrave të zeza në gjithësi dhe për kontributet e tij në aspektet kuantike të kozmosit të hershëm.

Çmimin e kanë fituar po ashtu edhe shtatë shkencëtarë të angazhuar në qendrën e Gjenevës Cern për studimin e grimcave misterioze të krijimit të botës.

Sipas shkencëtarit Hawking, shumë zhvillime shkencore në fushën e fizikës nuk merren në konsideratë për çmimin Nobel për shkak se vërtetimi i teorive është shumë i vështirë. Për këtë arsye, çmimet e reja që ndahen për shkencën kanë rëndësi shumë të madhe.

Çmimin e lartë e ka krijuar investitori rus Juri Miner në korrik të vitit 2012.

Mbrëmjen gala të ndarjes së tij në Gjenevë e ka drejtuar aktori i njohur amerikan Morgan Freeman.