Hasi nuk shkarkohet

Edhe pse nuk e fitoi asnjë trofe me Anderlechtin në edicionin që posa përfundoi, Besnik Hasi do ta vazhdojë ta udhëheq gjigantin belg edhe në kampionatin e ardhshëm.

Edhe pse mbetën duarthatë, drejtuesit e këtij klubi janë të kënaqur me punën e deritanishme që e ka bërë trajneri kosovar. “Ne jemi shumë të kënaqur me punën që e ka bërë Besnik Hasi”, ka deklaruar për “Anderlecht-Online” drejtori i klubit belg, Herman Van Holsbeeck.

Zëri shkruan se ai ka thënë se ish kapiteni i Shqipërisë do të qëndrojë gjatë në krye të shtabit teknik. “Hasi është zgjedhja jonë e gjatë për të ndërtuar një ekip me të rinj. Ne e kemi ruajtur këtë frymë në skuadër. Hasi e ka treguar më së miri këtë. Nuk duhet harruar fakti se deri në fund ishim në garë për titull, pastaj luajtëm në finale të Kupës, e mbi të gjitha duhet kujtuar pjesëmarrja e mirë në Ligën e Kampionëve”, ka theksuar ai.