Hasani për herë të parë titullar në Bundesligë

Sulmuesi shqiptar Ferhan Hasani është aktivizuar gjatë tërë ndeshjes te skuadra e Wolfsburgut, që pësoi humbje në shtëpi nga Freiburgu me rezultatin 2:0.

Ndeshja është zhvilluar të shtunën dhe i ka takuar javës së tetë të Bundesligës së Gjermanisë. Për Hasanin kjo është paraqitja e parë si titullar te Wolfsburgu, kurse ndeshja e tretë rresht në këtë edicion. Me këtë humbje, Wolfsburgu ka rënë në pozitën e fundit në tabelë me vetëm pesë pikë të grumbulluara.

Mërgim Mavraj luajti gjatë tërë ndeshjes te Greuther Furthi që barazoi 3:3 në udhëtim kundër Hoffenheimit.

Për Mavrajn kjo është ndeshja e tetë këtë edicion te Greuther Furthi që është ngritur në pozitën e parafundit me pesë pikë të mbledhura. Në stol te Furthi qëndroi sulmuesi Ilir Azemi.