Hasani: Nuk do ta votoja Isën për kryeministër

Deputeti i Partisë Demokratike të Kosovës, Nait Hasani, ka deklaruar se nuk do ta votonte asnjëherë Isa Mustafën për kryeministër të Kosovës. Gjatë debatit në Info Magazinë të Klan Kosovës, Hasani ka deklaruar se nuk mund ta votojë Mustafën për kryeministër, kur më shumë se 25 vjet më parë janë gjendur në dy taborë krejtësisht të kundërta.

“Me qenë në Kuvend nuk e kisha votu, jo pse unë kam diçka kundër tij, por në momentin kur Isa Mustafa ka qenë kryetar i Prishtinës, unë kam qenë si i mitur në burgjet e Serbisë. Pra, kam qenë në burgun e Gjurakovcit”, tha Hasani.

Deputeti që erdhi si zëvendësim për bashkëpartiakët e tij, të cilët u vendosën në pozicionet e ministrave, tha se nuk mund ta harrojë të kaluarën.

“Nuk mund ta votoj njeriun i cili ka qenë në funksion kur është luftuar nacionalizmi, irredentizmi, separatizmi e terrorizmi shqiptar, e unë kam qenë në burg i akuzuar dhe i dënuar për më shumë se 3 vjet për këtë arsye. Këto dyja bashkë nuk shkojnë”.

Ai nuk u shfaq i kënaqur as me bashkëqeverisjen me Lidhjen Demokratike të Kosovës.

“Unë mendoj se kjo është një qeveri që nuk i bën mirë vendit. Por, ajo është votuar dhe s’kam çfarë bëj”, tha Hasani. / Klan Kosova/