Hasani: Do ta vrisja Sekiraçën po të më jepej rasti

Në ditën e dytë të dëshmisë kundër Enver Sekiraçës, ish-polici Besnik Hasani ka deklaruar se ishte në gjendje ta vriste Sekiraçën po t`i jepej rasti, pas vrasjes së ish-kolegut të tij, Triumf Riza. Enver Sekiraça akuzohet për nxitje të vrasjes së Rizajt, shkruan sot Koha Ditore.

Besnik Hasani ka dëshmuar në atmosferë të tensionuar në gjykatë, e cila u shoqërua me sharje e fyerje me të akuzuarin. Fillimisht, situata ka filluar të acarohet kur dëshmitari Hasani, i cili është dënuar për shpërthimin në lokalin “Sekiraça”, teksa po merrej në pyetje nga mbrojtja e të akuzuarit, e ka quajtur atë “bandit”. Pas kësaj kanë reaguar avokatët e Sekiraçës, duke i kërkuar trupit gjykues që t`i tërhiqet vërejtja dëshmitarit dhe të ketë kujdes me fjalët.

“Unë nuk kam si ta quaj ndryshe një prijës të një bande kriminale”, ka thënë Hasani.

Megjithatë, kryetari i trupit gjykues, Arcadius Sedek, i ka kërkuar atij që të jetë më i matur, megjithëqë është i vetëdijshëm se me Sekiraçën nuk janë shokë tamam “të mirë”.

Duke folur për raportin e tij me policin e ndjerë, dëshmitari e ka përshkruar atë si raport miqësor. Për të, Riza ishte një polic i përkushtuar dhe nuk kishte konflikt me askënd, përveç me të akuzuarin. Pas vrasjes së Rizës, Hasani ka thënë se po t`i dilte përpara Sekiraça, do ta vriste megjithëqë ishte polic në detyrë.

http://koha.net/?id=3&l=59553