Haradinaj: Vasfija i dha zë të vërtetës dhe pasqyrë reale e përjetimeve tragjike të popullit të Kosovës

Kryeministri i vendit, Ramush Haradinaj ka takuar sot Vasfije Krasniqi Goodman, ndërsa tha se ajo i dha zë të vërtetës dhe forcë të të gjitha viktimave të dhunës seksuale gjatë luftës për të dëshmuar.

Haradinaj në një postim në rrjetin social Facebook shkruan se rrëfimi i Vasfijes i është pasqyra më reale e përjetimeve tragjike të popullit të Kosovës.

“Vasfije Krasniqi, mposhti heshtjen dhe u kryengrit kundër aktit më çnjerëzor, duke u bërë model i shoqërisë sonë për të guxuar. Ajo i dha zë të vërtetës dhe forcë të gjitha viktimave të dhunës seksuale gjatë luftës për të dëshmuar. Rrëfimi i saj, si pasqyra më reale e përjetimeve tragjike të popullit tonë, është shtysë e fuqishme për ngadhënjimin e drejtësisë dhe që ta njoh bota të vërtetën e Kosovës. Mëngjesin e sotëm, këtë grua të jashtëzakonshme, e përgëzova për guximin e përmasave heroike. Të gjitha viktimat e dhunës seksuale gjatë luftës e kanë tërë mbështetjen tonë dhe asnjëherë nuk duhet të ndihen të vetme në këtë betejë për drejtësi”, shkruan Haradinaj. /Telegrafi/