Haradinaj urdhër ministrave: Do të më njoftoni për çdo vizitë jashtë vendit

Qeveria e Kosovës ka mbajtur mbledhjen e saj të rregullt, në të cilën u morën një sërë vendimesh.

Gjatë kësaj mbledhje, kryeministri Ramush Haradinaj ka urdhëruar kabinetin e tij qeveritar dhe vartësit e tyre që ta lajmërojnë atë për çdo vizitë që e bëjnë jashtë vendit.

“Ky është një urdhër i lëshuar nga unë sot dhe ka hyrë në fuqi sot. Vendosa një rregull të tillë, sepse është në nderin tonë, të ministrave. Vendosja e një rregulli të tillë edhe për stafin e juaj, pra është ndihmesë për secilin prej juve, mirëpo në të njëjtën kohë edhe ndihmesë edhe për këtë qeveri”, tha Haradinaj.

Ai shtoi se do të vendos një pikë të rregullt në Qeveri për raportimin e ministrave për vizitat e tyre jashtë vendit .

“Çdo vizitë që bëhet me pare të popullit, dojmë me ditë përpara edhe pastaj çfarë ka ndodhë”, shtoi ai. /Telegrafi/