Haradinaj: Ta mbrojmë mjedisin dhe t’i riparojmë dëmet që i janë shkaktuar tokës

Kreu i ekzekutivit, Ramush Haradinaj, ka thënë se duke e ruajtur ekosistemin, ajrin e ujin, bjeshkët, biodiversitetin, florën dhe faunën, sigurohemi se po e bëjmë më të mirën për veten dhe brezat që vijnë, shkruan “Zeri.info”.

Haradinaj këto komente i ka bërë në profilin e tij zyrtar në rrjetin social “Facebook”, me rastin e “Ditës së Tokës”, i cili po ashtu ka thënë se kjo ditë shërben që të ngrihet vetëdija e përgjithshme për mbrojtjen e mjedisit dhe riparimin e dëmeve që i janë shkaktuar tokës.

Postimi i plotë i Haradinajt pa ndërhyrje:

Dita e Tokës, e cila po shënohet sot në mbarë globin, na shërben ta ngrisim vetëdijen e përgjithshme që ta mbrojmë mjedisin dhe t’i riparojmë dëmet që i janë shkaktuar tokës.

Duke e ruajtur ekosistemin, ajrin e ujin, bjeshkët tona, biodiversitetin, florën dhe faunën, sigurohemi se po e bëjmë më të mirën për vetën dhe brezat që vijnë.

Është koha që të angazhohemi të gjithë për një mjedis të shëndoshë, nga i cili varet cilësia e jetës sonë.