Haradinaj, Qeverisë: Ndalu vetë ose të ndalë populli

Kryetari i Aleancës për Ardhmërinë e Kosovës, Ramush Haradinaj, u ka thënë sot krerëve të shtetit, presidentes Atifete Jahjaga, kryeministrit Isa Mustafa, ministrit të Punëve të Jashtme Hashim Thaçit që janë duke gabuar në relacion me kufirin me Malin e Zi.

Kreu i AAK-së thotë se nga kjo po humbin rreth 12 mijë hektar tokë, e jo asnjë milimetër siç po pretendojnë Thaçi e Mustafa.

Haradinaj ka thënë se është shqetësuese puna që ka bërë Komisioni shtetëror për demarkacionin me Malin e Zi e po ashtu edhe më shqetësuese është se qeveria ka miratuar raportin e këtij komisioni, komision ky që sipas Haradinajt ka ofruar version të gabuar.

Sipas tij, kjo është një thirrje e sinqertë që po i bën presidentes dhe qeverisë që ta ndalin këtë veprim.

“Qeveria duhet të ndalet, nëse nuk ndalet vetë atë do ta ndalë populli”, ka thënë Haradinaj gjatë një konference për medie.