Haradinaj: Prania e KFOR-it në Kosovë faktor shumë i rëndësishëm, për paqe, siguri dhe stabilitet

Prishtinë – “Prania e KFOR-it në Kosovë është një faktor shumë i rëndësishëm, për paqe, siguri dhe stabilitet, jo vetëm në vend, por edhe për rajonin”, tha kryeministri Haradinaj.

Kryeministri i Republikës së Kosovës, Ramush Haradinaj, priti në takim komandantin e ri të KFOR-it në Kosovë, Gjeneral Major Salvatore Cuoci, me të cilin bisedoi për situatën e sigurisë në vend dhe për proceset tjera në Kosovë.

Fillimisht, kryeministri Haradinaj e uroi komandantin e KFOR-it, Cuoci për marrjen e detyrës së re, duke e falënderuar për mbështetjen që KFOR-i i jep popullit të Kosovës duke ofruar siguri për të gjithë qytetarët dhe veçanërisht për ndihmën e pakursyer për FSK-në, në rritjen e gatishmërisë së saj operacionale dhe teknike, me shpresë se kjo ndihmë do të intensifikohet, në avancimin e kësaj force.

Kryeministri Haradinaj e njoftoi Gjeneral Major Cuoci-n për proceset që po zhvillohen në Kosovë, veçanërisht në sektorin e sigurisë.
“Prania e KFOR-it në Kosovë është nja faktor shumë i rëndësishëm, për paqe, siguri dhe stabilitet, jo vetëm në vend por edhe për rajonin”, tha kryeministri Haradinaj.

Komandanti i KFOR-it në Kosovë, Gjeneral Major Salvatore Cuoci, falënderoi kryeministrin Haradinaj për pritjen, duke i ofruar mbështetjen e mëtutjeshme në fushën e sigurisë dhe të proceseve tjera demokratike në Kosovë./rajonipress/