Haradinaj: Po dialog me Pozitën – për datën e zgjedhjeve

Haradinaj ka bërë të ditur se kanë kërkuar që mos të thirren më seancat e Kuvendit, meqenëse ka një tendosje dhe situatë të rëndë politike, për shkak të marrëveshjeve të dëmshme dhe të rrezikshme të Bashkësisë së Komunave serbe dhe të versionit të Demarkacionit me Malin e Zi.

Lideri i Aleancës për Ardhmërinë e Kosovës (AAK), Ramush Haradinaj, në një intervistë për KosovaPress, ka folur gjerësisht për zhvillimet në vend dhe vendosmërinë e opozitës, që vendi të shkoj sa më parë në zgjedhje.

Haradinaj ka bërë të ditur se kanë kërkuar që mos të thirren më seancat e Kuvendit, meqenëse ka një tendosje dhe situatë të rëndë politike, për shkak të marrëveshjeve të dëmshme dhe të rrezikshme të Bashkësisë së Komunave serbe dhe të versionit të Demarkacionit me Malin e Zi.

Përveç kërkesës për shkuarjen e vendit në zgjedhje, ai tha se Qeveria e cila duhet të dorëhiqet, duhet të jap llogaridhënie.

Duke e quajtur të pakuptimtë vazhdimin e mbajtjes së seancave të Kuvendit, Haradinaj mohon çdo mundësi për një dialog me pozitën.

Ai vlerëson se i ka ardhur fundi kësaj situate, pasi që ka pasur kokëfortësi dhe insistim për zbatimin e këtyre marrëveshjeve të cilat janë të dëmshme për vendin.

“Pra tani ka kuptim një dialog për të vendosur për datën e zgjedhjeve, për çështje që lidhen me zgjedhjet. Por jo më dialog për tema tjera. Ne jemi të hapur për të diskutuar me të gjitha palët, për të shpallë zgjedhjet e jashtëzakonshme, që të shkon vendi në zgjedhje”, tha ai.

Haradinaj tha për KosovaPress se do ta shtojnë dhe më tej presionin për të penguar punën e Kuvendit të Kosovës, pasi që nuk mund të ketë funksionim normal të këtij institucioni.

E shkaktar për krijimin e krizës politike, sipas tij, janë kryeministri Mustafa dhe zëvendësi i tij Thaçi.

Haradinaj tha se opozita do të ndihen krenar, pasi penguan implementimin e këtyre marrëveshjeve.

“Përpos që është qeveris vendi me korrupsion, përpos që kemi vështirësi me ligj në planin e brendshëm dhe jashtëm, tani i kemi dhe dy marrëveshje që e varfërojnë më shumë Kosovën, por jo vetëm kaq, por e rrezikojnë funksionimin e vet. Ne bartim përgjegjësi për t’i kundërshtuar këto. Mendoj se kjo është një përgjegjësi që na bënë krenar, se nuk kemi lejuar që në Kosovë me u zbatu këto marrëveshje të gabuara”, ka thënë Haradinaj.

Sipas Haradinajt, partia që ai udhëheq mund të shkoj në zgjedhje si parti e vetme, por nuk përjashton as mundësinë që të shkojnë edhe si opozitë e bashkuar.

Ndërsa thotë se nuk e di se çfarë detyre mund të kryej pas zgjedhjeve, për të nuk është prioritet posti i kryeministrit, por ndryshimi i gjendjes në vend.

Sipas tij, për opozitën nuk ka aspak peshë zgjedhja e presidentit, duke pas parasysh gjendjen në vend. Ndërsa mohon që opozita ka një kundërkandidat për president të vendit edhe pse së fundi janë përfolur emra të ndryshëm, si Murat Jashari e Rexhep Qosja.

“Ne ende s’kemi një kandidat zyrtar si opozitë. Arsye është se ne duke pasur kundërkandidat, i japim legjitimitet zgjedhjes së presidentit. Ndërsa pozicioni ynë është mos marrje pjesë në seancë, pengim i kuorumit“.

Haradinaj mohon se gjithë këtë opozita po e bënë pasi që po i frikësohet Gjykatës Speciale dhe se kundërshtimin e marrëveshjeve po e përdor vetëm si pretekst.

Ndërsa thotë se janë kundër kësaj Gjykate, duke e konsideruar si të padrejtë trajtimin që po i bëhet Kosovës, e që është ndryshe nga ajo se si është trajtuar Serbia dhe palët tjera në luftë. Ai tha se do të votojnë kundër kësaj Gjykate.

Megjithëse caktimi i protestave në data të rëndësishme për vendin, po shihet si lojë me ndjenjat e qytetarëve, Haradinaj thotë se me ndjenjat e qytetarëve kanë luajtur ata që kanë devijuar nga interesi i qytetarëve dhe kanë thyer betimin e dhënë, për mbrojtjen sovranitetit të vendit.

Ai ka konsideruar se do të ishte mirë që pushtetarët, të mos e testojnë dhe më tej durimin e qytetarëve, të cilit i ka ardhur fundi. /Telegrafi/