Haradinaj: PDK-ja ka qeverisur keq, po vije koha e Rexhep Kadriut

Gjilan – Ramush Haradinaj në një takim me gratë e AAK-së tha se për këto shtatë vite PDK në nivel vendi, por edhe në Gjilan ka qeverisur keq. Koha e Rexhep Kadriut po vije dhe është fat i madh për Gjilanin që e ka një kandidat të tillë.

Ramush Haradinaj, Nexhat Daci, Ahmet Isufi e Rexhep Kadriu kanë mbajtur një takim përmbyllës me gratë e AAK-së dhe kandidatet e saja për asamble komunale, raporton rajonipress.

Ramush Haradinaj duke folur në këtë takim tha se Gjilani ka pasur një qeverisje të keqe e cila ka dështuar më të gjitha fushat.”PDK-ja ka dështuar në nivel vendi dhe në Gjilan dhe kjo është arsyeja kryesore që ta votoni Rexhep Kadriun, koha e të cilit po vije. Koalicioni AAK-LDD është koalicioni më serioz për Kosovën dhe Anamoravën. Qeveria e sotme po ikë dhe po vjen njeriu i dëshmuar për Gjilanin i cili lajmin e bëri me punë dhe projekte konkrete” ka spikatur Haradinaj.

Haradinaj tha se me qeverisjen e Kadriut, Gjilani do të përfitojë projekte bazike sepse ai do jetë kryeministër kah mesi i vitit të ardhshëm dhe do të përkrah çdo projekt që vije nga Gjilani.

Haradinaj tha se në projektet e AAK-së janë të parapara rrugët Gjilan – Dheu i Bardhë derisa punësimi është prioritet i tij.

Kurse Nexhat Daci tha se Gjilani dhe Anamorava nuk kanë përfituar asgjë për këto shtatë vite.”Anamorava është një oazë e izoluar sepse Qeveria e ka trajtuar në mënyrën më mizore. Tani po dominon zhvatja e fiseve dhe klaneve” tha Daci.

Dritë Maliqi nga LDD tha se Rexhep Kadriu është njeriu i duhur për Gjilanin dhe gratë e LDD-së masovikisht do ta përkrahin.

Edhe Ahmet Isufi nënkryetar i AAK-së tha se AAK tani mund të krenohet sepse ka një kandidat që vetëm të mira po i sjell Gjilanit.

Ndërsa vet Rexhep Kadriu kandidat për kryetar të Gjilanit tha se ai ka dëshmuar me punë se mund të jetë pjesë e kreut të Komunës dhe të ndihmojë qytetarët e saj dhe të gjitha lagjet e qytetit dhe fshatrat me projekte konkrete.”Unë nuk jam marrë me akuza e komente të tjerëve sepse mua më ka interesuar interesi dhe kërkesat e shumta të qytetarëve me të cilët jam përballuar për këta shtatë muaj” tha Kadriu.

Kadriu tha se Gjilani tani ka mundësi të zgjedhë njeriun e merituar dhe të përkushtuar të tyre. “Unë do të punojë me të gjitha kapacitet njerëzore e profesionale për ta bërë Gjilanin evropian dhe Gjilanin stabil e të qëndrueshëm politikisht dhe ekonomikisht” tha Kadriu.

Ajtene Shahiqi në emër të Aleancës së Gruas së AAK-së në Gjilan tha se do ta përkrahin fuqishëm Rexhep Kadriun sepse është i vetmi kandidat që ka përkrahur me të gjitha format perspektivën e gruas në Gjilan./rajonipress/