Haradinaj: Opozita s’do të jetë pjesë e një kuvendi jolegjitim

​Kryetari i AAK’së, Ramush Haradinaj, e ka arsyetuar vendimin e përbashkët të tri grupeve parlamentare të partive opozitare për të mos marrë pjesë në seancat e Kuvendit.

Haradinaj në një intervistë për “Epokën e re” ka thënë se opozita nuk i ka dorëzuar mandatet, por nuk do të marrë pjesë në seancat plenare të një kuvendi që, sipas tij, është jolegjitim.

Ai ka thënë se Kuvendi i Kosovës tashmë është bërë mbulesë për kapjen e shtetit.

“I vetmi që mund të vendosë tash e tutje është qytetari”, është shprehur Haradinaj, duke bërë me dije se opozita mbetet e bashkuar në pikat për të cilat është rënë dakord më herët.

Në këtë kontekst, ai ka thënë se opozita do ta rrisë kundërshtimin e saj me anë të protestave deri në dorëheqjen e regjimit Mustafa-Thaçi./Gazeta Express/