Haradinaj: Kurti në vizitë turistike derisa qytetarët e Deçanit ishin në gjendje të tmerrshme

Kryetari i AAK’së Ramush Haradinaj ka folur për helmimin e qytetarëve ne Deçan. Ai thotë se situata ishte shumë e rëndë. Ka kritikuar institucionet e vendit për vonesë të reagimit.

“Ka qenë një gjendje lufte, gjendje e tmerrshme, shumë pacientë me simtope mjaft të vështira’, thotë Haradinaj.

“Gjatë ditës së djeshme ka qenë e vështirë, sot për fat të mirë është qetësuar gjendje por tash në mbrëmje prapë po vazhdojnë”, shtoi ai për RTV Dukagjini.

Ish-kryeministri ka kritikuar kryeministrin Albin Kurti i cili sipas tij, po qëndron në një ‘vizitë turistike” në kohën kur qytetarët janë në vështirësi.

“Reagim s’ka, ka vizita turistike të presidentes, të kryeministrit por reagim nuk ka”, tha Haradijan.

“Greqia është pak orë larg prej këtu. Pra mundesh me u kthy në çdo kohë. Nuk e shoh cila është pesha e agjendës së kryeministrit më tutje. E marrë vesh që ka qenë në një seminar atje, ka zhvilluar një takim a dy. Nuk e kuptoj pse duhet me vazhdu turizmin në Greqi nëse ke situata në vendin tënd…Nuk po flasim për dhjetëra, por janë mbi një mijë njerëz me simptome bukur të rënda’, tha Haradinaj.

“Në situata të tilla së pari mblidhet Këshilli Kombëtar i Sigurisë dhe vlerësohet gjendja dhe ndërmerren masat emergjente”, shtoi ai.

Haradinaj kritikoi edhe Ministrinë e Shëndetësisë.

“MSH nuk ka sjell një kontingjent ilaçesh, ka reagu me vonesë. Është e habitshme kjo qasje e tillë”, tha Haradinaj.

Sipas të dhënave zyrtare, shqetësime u shfaqën nga banorët e fshatrave Prejlep, Rastavicë, Irzniq, Gllogjan, Shaptej, Gramaqel, Baballoq, Ratishë dhe Jasiq i ri.

Instituti Kombëtar i Shëndetësisë Publike (IKSHPK), ka bërë të ditur të hënën se nga gjashtë mostra të testuara të ujit, në dy prej tyre kanë gjetur koloni të dyshimta të baktereve.

Megjithatë, sipas drejtorit të IKSHPK’së, Naser Ramadani, testimet duhet të vazhdohen të bëhen në laborator dhe shkaku i saktë i këtij helmimi nuk është përcaktuar ende.

Në anën tjetër, Prokuroria e Pejës, ka njoftuar se ka nisur hetimet lidhur me shkaqet e këtij helmimi ndërsa Ministria e Shëndetësisë, u ka bërë thirrje të gjithë qytetarëve të Deçanit që të mos konsumojnë ujin nga “Hidrodrini”, derisa të përcaktohet shkaku i helmimit.