Haradinaj konfirmon planet për bashkëqeverisje me PDK-në

Prishtinë – Kryetari i Aleancës për Ardhmërinë e Kosovës, Ramush Haradinaj, ka konfirmuar se është duke u bërë një plan për bashkëqeverisje me PDK-në. Ai nuk ka dhënë shumë detaje rreth këtij plani, megjithëse ka theksuar se si Aleancë do të marrin përgjegjësitë, të cilat u takojnë, raporton KTV.

I pyetur nëse pas kthimit të tij ka ndryshuar mendimin për qeverisjen e tanishme duke mos parë edhe kritikat e shumta për korrupsion dhe përfshirjen e SHIK-ut në të, Haradinaj është përgjigjur duke thënë se gjendja në vend nuk është e mirë, por sipas tij, së bashku do të punojnë në përmirësimin e saj.

Nënkryetari i AAK-së, Blerim Shala i cili ka udhëhequr deri tashti AAK-në në mungesë të Haradinjat, ka konfirmuar se do të udhëtojë edhe ai në Bruksel, për të marrë pjesë në takimin i cili do të mbahet midis kryeministrit Hashim Thaçi dhe atij serb Ivica Daqiq. Këto komente të Shalës dhe Haradinajt u bën pas takimit me Këshillin Drejtues të partisë.