Kryeministri në detyrë, Ramush Haradinaj, ka marrë sot pjesë ne debatin “Fol Hapur”. Ai në fillim të debatit është pyetur për vendimet e para që do t’i marrë Qeveria e re, nëse udhëhiqet nga ai, thuhet në njoftimin për media.
Haradinaj ka thënë se vendimet e para kryesisht do të jenë lidhur me ekonominë.
Ai ka thënë se një prej këtyre vendimeve do të jetë ai për TVSH-në, që të mos paguhet në doganë, por drejtpërdrejt nga qytetari, në mënyrë që të mos mbahet paraja peng nga bizneset.
“Zbatimi i Ligjit për TVSH-në, që mos me u pagua në kufi, në dogana. Do të jenë kryesisht vendime qeverisëse që kanë lidhje me ekonominë. Është një listë e gjatë që e vendimeve për qeverisjen e re, që do të kenë lidhje me Qeverinë”, ka thënë Haradinaj.
Haradinaj ka treguar se kur e ka marrë Qeverinë në mandatin e parë nuk prodhohej as rrymë.
“Kur kom marrë unë qeverinë, nuk është prodhuar rrymë, besoni ose jo. Pra nuk është mih qymyr dhe ne kemi importu qymyr nga fqinjët”, ka thënë ai.
Haradinaj pati marrë vendim që KEK-u të prodhojë rrymë më shumë dhe të mos ketë reduktime. /Telegrafi/
