Haradinaj: Gjilanit e Anamoravës nuk do t`i hymë në hak

Gjilan- Lideri i AAK-së Ramush Haradinaj i cili mori pjesë në 13 vjetorin e themelimit të degës së AAK-së në Gjilan dhe në shpërndarjen e 200 librezave për anëtaret e reja të AAK-së tha se me ardhjen në pushtet të AAK-së Gjilani dhe Anamorava do të kenë tretman krejt ndryshe. Këtij regjioni është gjynah me i hyje në hak , andaj AAK do ta ketë prioritet këtë regjion tha Haradinaj.

Lideri i AAK-së Ramush Haradinaj i shoqëruar edhe nga Ahmet Isufi, Melihate Tërmkolli, Stiven Shuk, Tomë Hajdaraj e Besnik Tahiri kanë bashkëbiseduar në 13 vjetorin e themelimit të AAK-së në Gjilan, ku edhe u shpërndan 200 libreza të reja.

Ramush Haradinaj duke folur për zhvillimet politike tha se do të hyjë në qeverisjen e ardhshme i bindur se ka një koncept të shëndosh dhe avancues duke krijuar një ligj të besueshëm e kredibil dhe që u shërben të gjithëve, dhe gjithsesi që askush të mos jetë mbi ligjin.

Haradinaj gjithashtu tha se ka biseduar me shumë ndërkombëtar dhe u ka thënë atyre se ka një ofertë ekonomike të sinqertë për qytetarin e Kosovës dhe bizneset në përgjithësi duke eliminuar burokracitë korruptive dhe duke krijuar vende të reja të punës.

Haradinaj më pas e ka falënderuar dhe uruar njëkohësisht Rexhep Kadriun tashmë i nominuar për kryetar të Gjilanit për të cilin tha se është njeriu i duhur për Gjilanin.”Me ardhjen në pushtet të AAK-së , Gjilani dhe Anamorava do të kenë tretman krejt ndryshe. Këtij regjioni është gjynah me i hyje në hak, andaj AAK do ta ketë prioritet. Gjilani do të ndihmohet me projekte konkrete” tha Haradinaj.

Edhe Ahmet Isufi nënkryetar i AAK-së tha se AAK do të jetë parti kredibile në Gjilan sepse ajo qysh tash e ka ndryshuar jetën e qytetarëve të saj me punë e angazhime vullnetare. “Unë jam i sigurt se në vjeshtë Rexhep Kadriu do të jetë kryetar i Gjilanit dhe AAK do ta bëjë Gjilanin më ndryshe dhe me një kryetar më të devotshëm e më të përgjegjshëm” tha Isufi.

Kurse Rexhep Kadriu kryetar i AAK-së në Gjilan tha se AAK për pak kohë në Gjilan e ka ndryshuar klimën e besimit dhe mirëkuptimit.”AAK përfundimisht po përgatitet të marrë detyra të reja sepse kemi ecur shumë shpejt për vetëm pak ditë. Gjilanit do i`a kthejmë dinjitetin e nëpërkëmbur nga ky pushtet i pandërgjegjshëm “.

Kadriu tha se më punë vullnetare që kanë bërë në teren e kanë sfiduar pushtetin komunal i cili për shumë vite e ka nëpërkëmbur dinjitetin e qytetarit.”Fati i gjilanasve nuk bënë që tash e tutje të lihet në duart e këtyre pushtetarëve” tha Kadriu.

Ajtene Shahiqi nga Forumi i Gruas i AAK-së së bashku me Haradinajn e Kadriun i kanë shpërndarë 200 libreza për aktiviste, studente e gra të devotshme që e kanë përkrahur dhe përqafuar vizionin që AAK të jetë në krye të qeverisjes lokale e qendrore./rajonipress/