Haradinaj: FSK-ja plotësisht e gatshme të shërbejë për paqe dhe siguri edhe përtej kufijve të vendit tonë

Kryetari i Aleancës për Ardhmërinë e Kosovës Ramush Haradinaj, në shënim të dyvjetorit të formimit të Ushtrisë së Kosovës, ka thënë se FSK-ja është plotësisht e gatshme të shërbejë për paqe dhe siguri edhe përtej kufijve të Kosovës.

“Sot, kur shënojmë dyvjetorin e miratimit në Kuvendin e Republikës së Kosovës të Ligjit për Ministrinë e Mbrojtjes, Forcës së Sigurisë së Kosovës (FSK) dhe atij për Shërbim në FSK, mund të themi se Ushtria e Kosovës është plotësisht e gatshme të shërbejë për paqe dhe siguri edhe përtej kufijve të vendit tonë”, ka shkruar Haradinaj në llogarinë e tij në “Facebook”.

Ai ka thënë se vendimi për formimin e ushtrisë nuk ishte aspak i lehtë, por më i rëndësishmi pas shpalljes së pavarësisë.

“14 Dhjetori i 2018-ës ishte ditë historike për Kosovën, ndërsa vendimi për formimin e Ushtrisë ishte një ndër vendimet aspak të lehta, por më të rëndësishmet pas shpalljes së pavarësisë. Falënderoj secilin deputet që votoi për ushtrinë, që nënkupton votim për paqe e siguri në rajon. Kosovë, urime dyvjetori i Ushtrisë!”, është shprehur Haradinaj. /EkonomiaOnline/