Haradinaj: Do t’i përkrahim protestat, por jo dhunën

Lideri i Aleancës për Ardhmërinë e Kosovës, Ramush Haradinaj ka thënë të mërkurën në një konferencë për media se tash e tutje do të jenë aktiv në thirrje, përkrahje dhe organizim të zërit protestues, por për dallim nga Vetëvendosje që nuk e përjashton dhunën si mundësi në protesta, AAK thotë se nuk e përkrah dhunën.

Ai tha se tashmë janë bërë një varg temash për të cilat mund të protestohet si korrupsioni, gjendja e rëndë ekonomike, rendi dhe ligji dhe marrëveshjet e nënshkruara në Bruksel.

Haradinaj tha se këto marrëveshje kanë disa pjesë që e dëmtojnë Kosovën.

Lideri i AAK-së e përmendi edhe demarkacionin me Malin e Zi, për të cilën tha se është i dëmshëm për Kosovën dhe që do të jetë një ndër pikat për të cilat protestohet.

Ai e ka kundërshtuar edhe deklarimin e Mustafës se demarkacioni me Malin e Zi është punë e kryer. Sipas tij ratifikimi i marrëveshjes i takon Kuvendit dhe në këtë drejtimin shprehu besimin se kjo marrëveshje nuk do të kalojë në Kuvend.

Haradinaj ka folur për organizimin e protestave, duke thënë se AAK është e qartë në këtë drejtim dhe nuk do të përkrah dhunën në protesta. /Telegrafi/