Haradinaj: Demarkacioni me Malin e Zi po shndërrohet në problem serioz

Deputeti nga radhët e Aleancës për Ardhmërinë e Kosovës, Ramush Haradinaj foli të enjten në seancën e Kuvendit të Kosovës lidhur me demarkacionin me Malin e Zi. Ai tha se kohët e fundit vija kufitare me Malin e Zi ka depërtuar në brendi të Kosovës.

Haradinaj tha se i vjen keq që zëvendëskryeministri Hashim Thaçi nuk ndodhet në seancë pasi sipas tij ai ka përgjegjësi direkte lidhur me demarkacionin me Malin e Zi.

Ai tha se Kosova dhe Mali i Zi i kanë pasur kufijtë e rregulluar, por kohët e fundit ka një vijë kufitare që kanë depërtuar në brendi të territorit të Kosovës.

“Ata që kanë krijuar këtë gjendje duhet ta riparojnë”, tha Haradinaj, duke shtuar se Mali i Zi ka bjeshkë mjaftueshëm dhe Kosova nuk ka nevojë t’i ofrojë shtesë, raporton Telegrafi.

Ashtu si ka nevojë Kosova për fqinjësi të mirë, ashtu ka nevojë edhe Mali i Zi, tha Haradinaj, duke shtuar nëse Qeveria e Kosovës nuk e kthen kufirin ku ka qenë më parë, atëherë qeveria me vetëdije po e krijon një problem të madh për Kosovën. /Telegrafi/