Hapet edicioni i katërt i ekspozitës së artit pamor “Salloni i Gjilanit 2012”

Gjilan- Në kuadër të festimeve të 100 vjetorit të Pavarësisë së Shqipërisë nga Komuna e Gjilanit, në Galerinë e Qytetit në praninë e artdashësve gjilanas dhe atyre kosovarë sonte në Gjilan u hap Ekspozita tradicionale për artistët e kosovarë “Salloni i Gjilanit” për vitin 2012.

Të pranishmit në emër të Shoqatës së Arteve Pamore të Gjilanit i përshëndeti piktori Avni Behluli i cili tha që shoqata po punon në funksion të promovimit të vlerave të mirëfillta kulturore në Gjilan.

Hapjen e edicionit të katërt të ekspozitës tradicionale “Salloni i Gjilanit” e bëri Veton Nevzadi, drejtor për Rini, Kulturë dhe Sport i cili me këtë rast në emër të kryetarit Mustafa falënderoi komunitetin e gjerë të artistëve gjilanas për punën e vazhdueshme që po e bëjnë për të mbajtur dhe avancuar vlerat artistike në nivel komune dhe vendi.

Nevzadi me këtë rast tha se Gjilani po bëhet një eksperiencë e bukur kulturore për këdo që jeton në këto hapësira.

Çmimin e parë të Sallonit të Gjilanit e fitoi Eshtref Qahili (pikturë), Ahmet Ibrahimi (pikturë) dhe Arta Llapashtica (grafikë)./rajonipress/