Hapen disa rrugë në fshatrat malore të Kamenicës

Gjilan – Zyrtari i drejtorisë për Mbrojtje dhe Shpëtim, Ramadan Berisha, ka thënë se janë rihapur, aftësuar rrugët e dëmtuara nga shiu dhe bora dhe drunjtë e rrëzuar në viset malore. Rrugët e aftësuara për qarkullim pa pengesë janë Gjyrishec nga përmendorja deri te shkolla , si dhe disa rrugë të tjera lokale, rruga në fshatin Lisockë, rruga te lagjja e “Huruglicëve”, brezi kufitarë Shahiq-Zhujë, Tyxhec lagjja e “ Krasniqëve” ku është bërë lidhja e rrugës nga Tyxheci deri në Meshinë, si dhe rruga në Karaçevë të Epërme nga mëhalla “ Velia” deri tek kufiri, gjegjësisht fshati Çarr.

Hapja e këtyre rrugëve është realizuar nga drejtoria për Mbrojtje dhe Shpëtim, në bashkëpunim me zyrën e kryetarit.“Me hapjen e këtyre rrugëve, banorëve u është mundësuar qarkullim më i lehtë, si dhe shkuarja deri tek pronat e tyre për të punuar, po ashtu është krijuar mundësia e qarkullimit të mjeteve transportuese si dhe automjeteve të zjarrfikësve, në rast të zjarreve të cilat janë më të shpeshta në zonën kufitare “ ka thënë Berisha.

Ai tha se banorëve të pakt që kanë mbetur në këto anë me ndihmën e ofruar tregon se nuk janë harruar nga komuna e tyre.

Kadrush Osmani, banorë nga fshati Shahiq, shtëpia e të cilit kishte qenë e izoluar për shkak të rrugës, ku ai dhe familjarët e tij vetëm në këmbë kanë pasur mundësi të shkojnë tek shtëpia. Me hapjen dhe zgjerimin e rrugës, kësaj familje u është mundësuar qarkullim më i lehtë për mjetet e ndryshme të transportit.

Po ashtu edhe Blerim Isufi, nga fshati Gjyrishec, i cili merrej me bujqësi e falënderoj komunën për aftësimin e rrugës së shkatërruar nga të reshurat e shiut dhe borës.

Edhe Brahim Isufi, banor i fshatit Gjyrishec, ka falënderuar kryetarin Surdulli, për hapjen e rrugëve në fshatin ku ai jeton.

Ndërsa, Amir Gërbavci, Kryetari i Këshillit Lokal për Lisock, Shahiq, Zhuj dhe Gjyryshevc, ka falënderuar organet komunale për punën që kanë bërë për këta banor të cilëve u janë krijuar kushte më të mira për të jetuar.

Kryetari i komunës së Kamenicës, Shaip Surdulli, ka theksuar se edhe nëse është një shtëpi e vetme në viset malore, rruga do t’i hapet në mënyrë që banorëve tu krijohen kushte për të jetuar atje dhe për mos tu shpërngulur për shkak të rrugës, e sidomos ata banorë të brezit kufitar./rajonipress/