Deputeti i PDK-së, Bedri Hamza, ka kritikuar Qeverinë, e cila ka sjellë në Kuvend propozimin për shkarkimin e Bordit të RTK-së.
Hamza ka thënë se nuk qëndron pretendimi i pozitës që në RTK nuk ka pasur auditim.
“E padrejtë dhe e papranueshme me thënë që RTK-ja nuk ka pasur auditim, dallon kur auditimin e kryen zyra e auditimit dhe kur auditimi kryhet nga një auditim i jashtëm”, ka deklaruar Hamza në Kuvend, raporton Zeri.info.
Ai ka thënë më tej se nuk është duke mbrojtur shkeljet ligjore, ndërsa ka akuzuar Qeverinë se jo vetëm që e ka kapur shtetin, por, siç ka thënë ai, “kjo është plasje e shtetit”.
“Ka dallim mes raportit financiar dhe raportit të punës. Nuk jam këtu për të mbrojtur shkeljet ligjore të askujt. Kjo më nuk është kapje e shtetit, kjo është plasje e shtetit, shkarkoni me një vendim gjitha bordet, mirëpo le të mendojnë edhe ata të cilët janë duke bërë këto veprime që munden me u përball me përgjegjësi ligjore. Është keqpërdorim i pozitës zyrtare kur ke tejkalim të kompetencave ligjore.
Unë kam pritur që nga shumica me pa propozime për Ligjin për RTK-në dhe kjo vetëm shkarkime bordesh. Çka ka ndërruar gjendja për të mirë në disa ndërmarrje ku ka ndodhur shkarkimi kundërshtim me ligjin”, ka deklaruar Hamza. /Zëri
