Hamiti: Prijësit fetarë të punojnë më shumë për tolerancën

Për Xhabir Hamitin, dëshmi e tolerancës fetare në Kosovë janë shembujt ku anëtarë të një komuniteti fetar e kanë ndihmuar komunitetin tjetër për ndërtim tempujsh të fesë apo anasjelltas. Por, sipas tij, prijësit fetarë duhet të punojnë më shumë sa i përket tolerancës fetare. Ka thënë se njeriu para së gjithash është krijesë humane.

Në një intervistë dhënë “Kohës Ditore”, Hamiti problemin e fshatit Llapushnik e ka cilësuar si të izoluar dhe si një rast që duhet të zgjidhet shpejt nga vetë banorët lokalë. Sipas tij, protesta e banorëve të fshatit që kundërshtojnë lokacionin e ndarë për varreza e kishë katolike nuk duhet të përgjithësohet, megjithëse e ka cilësuar si imazh tepër të keq për ne dhe për vendin.

Për Hamitin, që është profesor në Fakultetin e Studimeve Islame në Prishtinë, udhëheqësit fetarë janë të parët që duhet t’i kontribuojnë tolerancës fetare dhe të parët të cilët e dëmtojnë atë në rast se devijojnë nga koncepti i shëndoshë i besimit në Zot.

Ka thënë se deklaratat e prijësve fetarë në mbrojtje të besimit të tyre nuk duhet shikuar si nxitje e urrejtjes, por përgjithësisht si qëndrime konform bindjes shpirtërore që kanë krijuar.

Pjesëmarrjen e shqiptarëve krahas forcave të shtetit islamik e ka cilësuar si fakt tepër shqetësues në aspektin e brendshëm, atë fetar e kombëtar. Raportin e Departamentit Amerikan të Shtetit, ku vlerësohet se ka rritje të ekstremizmit në Kosovë, Hamiti e ka përshkruar si shqetësues dhe tregues të çalimit të shoqërisë kosovare në këtë aspekt.

Sa i përket çështjes se a duhet t’i prijë feja kombit apo anasjelltas, Hamiti ka thënë se të gjitha komunitetet fetare shqiptare kanë një gjuhë, një gjak e një traditë dhe, para së gjithash, në rend të parë duhet të jetë “e mira e përbashkët e tyre”. Sipas tij, ata të cilët thonë se feja islame nuk njeh komb, në fakt nuk e njohin as veten e as Zotin.

http://koha.net/?id=27&l=64053