Haliti: Vitia shembull i mirë në Kosovë në aspektin e sigurisë

Viti – Komuna e Vitisë është marrë si shembull i dy komunave më të mira në aspektin e sigurisë krahas komunave të Kosovës ka thënë Sokol Haliti.

Këshilli Komunal për Siguri në Bashkësi, ka mbajtur sot takimin e fundit për këtë vit, në të cilin është diskutuar për gjendjen e sigurisë dhe zbatimin e Planit të punës së KKSB-së për vitin 2015.

Në këtë mbledhje, kryetari i komunës Sokol Haliti ka falënderuar gjithë mekanizmat e sigurisë dhe grupet që kanë qenë pjesë e zhvillimeve të gjithëmbarshme në arritjen e progresit në komunën e Vitisë.

Ai ka njoftuar anëtarët e KKSB-së për takimin e djeshëm me kryetarët e komunave të Kosovë, Ministrinë e Punëve të Brendshme, përfaqësues të ambasadave dhe mekanizmave të tjerë të sigurisë, ku Vitia është cilësuar si shembull për gjendjen e mirë të sigurisë. “Komuna e Vitisë është marrë si shembull i dy komunave më të mira në aspektin e sigurisë krahas komunave të Kosovës. Kjo është një e arritur e madhe pasi që edhe kemi shembullin e shkollës multietnike në Binqë, por edhe krijimin e një klime tolerante dhe të mirëbesimit në komunë. Kjo duhet vlerësuar si rezultat i bashkëpunimit të mirë mes institucioneve dhe qytetarëve”, tha ai.

Haliti ka çmuar edhe punën dhe bashkëpunimin me Policinë e Kosovës, njeherit edhe kontributi i KKSB-së dhe EVSB-së ka ndikuar në këtë përmirësim të gjendjes. “Kërkoj nga ju që kështu të vazhdoni të bashkëpunoni dhe të respektojmë shtyllat e shtetit, sikur edhe gjitha etnitetet në përgjithësi. KKSB ka rol shumë të madh e të rëndësishëm, andaj ju ftoj të bashkëpunoni”, ka thënë Haliti.

Për situatën e sigurisë ka raportuar komandanti i stacionit policor në Viti kapiten Agim Lipovica, i cili e ka vlerësuar situatën shumë më stabile se vitin paraprak.

Ai ka bërë të ditur se në gjitha llojet e rasteve ka pasur rënie të numrit si në vjedhje, raste kriminale, të aksidenteve etj.

Anëtarët e KKSB-së kanë dhënë propozimet e tyre për disa raste që duhet të ndërmerren masa , ndërkohë që në lidhje me planin e punës së KKSB-së, kanë vlerësuar se është realizuar mbi 80 % e këtij plani.

Ndërsa si rekomandime që dolën nga ky takim, zv.kryetari i komunës Hasan Aliu që edhe ka kryesuar këtë takim, përmendi 3 pika që u konsideruan si më të rëndësishme siç është: Shtimi i patrullimit të policisë në pjesën afër kishës serbe në Viti, të diskutohet në shkolla për sjelljet e nxënësve ndaj objekteve fetare, si dhe të apelohet për përdorim të kontrolluar të mjeteve piroteknike./rajonipress/