Haliti takoi afaristët dhe bizneset e komunës së Vitisë

Viti – Kandidati për kryetar i Komunës së Vitisë nga dega e LDK-se në Viti, Sokol Haliti në takim me afaristët dhe bizneset e Vitisë premtoi përkrahje pa dallime partiake të të gjitha bizneseve që gravitojnë në komunën e Vitisë.

Ai tha se do të ketë ulje të koeficientit të tatimit në pronë për depo, sepse nuk mund të llogariten njëjtë si lokalet në qendër të qytetit.

Haliti ka premtuar edhe Rregullim të infrastrukturës në zonën industriale Viti – Kllokot si kanalizimi, ujësjellësi, instalimi i rrjetit kabllor për telefoni fikse dhe internet.

“Do të hap zyre në ndihmë shoqatës së biznesit në mënyrë që të dëgjojmë vërejtjet dhe propozimet e tyre. Do të bëjmë kërkesë për ndryshim të udhëzimit administrativ në lidhje me taksat dhe tatimet sepse konsiderojmë se janë antikushtetuese dhe shkelje e të drejtave të njeriut” tha Haliti.

Në vazhdim ai dëgjoi kërkesat e tyre në mënyrë që të futen në draft strategjinë e tij në mandatin 4 vjeçar thuhet në njoftimin e degës së LDK-së në Viti./rajonipress/