Haliti po udhëheq skuadrën debutuese drejt titullit

Prishtinë – Sulmuesi kosovar, Labinot Haliti, e nisi në hije edicionin te skuadra australiane, Western Sydney Wanderers. Por futbollisti prishtinas është stabilizuar në skuadër dhe në xhirot e fundit ka shënuar gola vendimtarë, që e mbajnë skuadrën e tij në krye të kampionatit të Australisë, A-League.

Haliti të shtunën shënoi dy gola në fitoren e Western Sydneyt me rezultatin 3:1, në udhëtim kundër Melbourne Heart. Haliti ka shënuar tre gola në tri ndeshjet e fundit, ndërsa gjithsej këtë edicion ka realizuar pesë herë.

Ai kundër Melbournet ishte titullar dhe u aktivizua deri në minutën e 88-të, ndërsa skuadra e tij po vazhdon t’i prijë klasifikimit në A-League.

Pas 25 xhirove të zhvilluara, Western Sydney ka tubuar 53 pikë, tetë më shumë se skuadra Central Coast Mariners që ka një ndeshje më pak të zhvilluar.

Fitorja ndaj Melbournet ishte e dhjeta rresht për Western Sydneyn që është bërë skuadra e parë në histori të A-League me një rekord të tillë. Për Western Sydney ky është edicioni i parë në elitën e futbollit të Australisë.(koha)