Haliti: Po i lidhim fshatrat njëra me tjetrën për të siguruar qarkullim të lirë e të sigurt

Viti – Banorët e fshatrave Beguncë dhe Lubishtë janë mbledhur sot së bashku në rrugën “Xhepa”, rrugë kjo e cila lidhë banorët e këtyre fshatrave dhe e cila deri me tani ka qenë e pakalueshme. Por kjo gjendje do të ndryshoj së shpejti pasi që sot Kryetari i Komunës së Vitisë, Sokol Haliti me bashkëpunëtor zyrtarisht kanë bërë përurimin e fillimit të projektit për shtruarjen me zhavorr të kësaj rruge.

Ndërkaq ata u mirëpritën nga banorët e të dyja lokaliteteve të cilët shprehën falënderimet për këtë projekt që sipas tyre është shumë i rëndësishëm për zhvillimin e bujqësisë por edhe për qarkullimin e lirë të banorëve të Beguncës dhe Lubishtës.

Kryetari i Komunës së Vitisë, Sokol Haliti me rastin e fillimit të projektit për shtruarjen me zhavorr të rrugës fushore Lubishtë-Beguncë në vendi e quajtur Xhepa, tha se ky projekt po realizohet në kuadër të projekteve të shumta në të gjitha lokalitetet e kësaj komune duke potencuar se qarkullimi për gjatë kësaj rruge ka qenë e pamundur. “Në këtë rrugë qarkullimi ka qenë i pamundur jo vetëm me automjete por edhe në këmbë, andaj banorët e këtyre dy lokaliteteve për qarkullimin e mallrave dhe njerëzve kanë qenë të detyruar të marrin një rrugë më të gjatë. Ne si Institucione komunale e kemi parë si shumë të nevojshëm rregullimin e kësaj rruge “ u shpreh Haliti.

Ai tha se në kuadër të projekteve të shumta në fushën infrastrukturore komuna e Vitisë është duke lidhur fshatrat njëra me tjetrën dhe po sigurohet për qarkullimin e lirë dhe të sigurt.

Ndërkaq ai bëri me dije se toka për skaj të kësaj rruge është e përshtatshme për zhvillimin e kulturave të ndryshme bujqësore.

Ndërkaq Burim Mustafa Kryetar i fshatit Lubishtë dhe Azem Baliu, Kryetar i fshatit Beguncë u pajtuan se kjo rrugë është në interes të dy fshatrave jo vetëm për të lehtësuar qasjen e bujqve në tokat e tyre por edhe për qarkullimin e banorëve mes veti.

Riza Hysku, banorë i fshatit Lubishtë i cili ka në pronësi tokë bujqësore për skaj të rrugës “ Xhepa” foli për pamundësitë që kanë hasur deri me tani për të punuar tokën për shkak të rrugës së dëmtuar. “ Shtrimi i kësaj rruge me zhavorr dhe rregullimi i saj për ne fermerët që kemi tokë në këtë pjesë ka një domethënie të madhe, dhe për këtë falënderojmë kryetarin e Komunës. Për shkak se kjo rrugë ka qenë shumë e dëmtuar ka qenë pothuajse e pamundur të punohet toka në këtë pjesë dhe tani me rregullimin e saj bujqit do ta kenë shumë më lehtë” u shpreh Hysku.

Ai tha se përmes kësaj rruge shkurtohet distanca në mes të fshatrave Lubishtë dhe Beguncë. Përndryshe ky projekt po financohet nga Komuna e Vitisë./rajonipress/