Haliti nderon me mirënjohje veprimtarin e dalluar në Francë Shaqir Shabani

Nga Ibrahim Sefedini – Gaillard, Francë – Gaillard, Francë – Kryetari i Komunës së Vitisë, Sokol Haliti, gjatë vizitës në Francë ku morri pjesë në Forumin Ndërkombëtar të Mobilitetit të Qëndrueshëm 2030, ka takuar edhe aktivistin e dalluar të Kosovës në Francë z. Shaqir Shabani, të cilin për kontributin e dhënë në përpjekjet për pavarësi të Kosovës e ka nderuar me mirënjohje të veçantë. “Baca Shaqë gjithë jetën e vetë kontribuoi për lirinë dhe demokracinë e Kosovës, dhe për këtë kam nderin që në emër të institucioneve komunale ta nderoi me këtë mirënjohje të veçantë”, ka thënë kryetari Haliti.

Ai ka theksuar se baca Shaqë përmes mbështetjes që u ka dhënë mërgimtarëve , të cilët si pasojë e dhunës së okupatorit serb kishin ikur në Francë, pastaj për lobimin e çështjes së Kosovës në institucione dhe mekanizma të ndryshëm në Francë e Zvicër si dhe aktivitete tjera ka lënë gjurmë të pa shlyera në përpjekjet gjithë popullore për liri e pavarësi, prandaj Vitia si komunë është e nderuar që nga gjiri I saj ka nxjerrë një veprimtarë të tillë.

E, veprimtari Shaqir Shabani, pasi është shprehur falënderues për çmimin e dhënë nga kryetari Haliti, ka thënë se ai dhe shoqata kulturore “Rugova’ të cilën e drejton, ishin dhe do të mbesin përherë pranë Kosovës dhe nuk do të ndalen së punuari për të mirën e vendit. “Është shumë me rëndësi që tani pasi është fituar liria, gjenerata e tretë e mërgimtarëve në Francë e Zvicër krahas suksese që po arrijnë në procesin e integrimit në institucionet e këtyre vendeve, të jenë më të lidhura për Kosovën ,pasi me përvojën që fitojnë këtu mund të ndihmojnë në ndërtimin e demokracisë në këtë vend”, ka thënë Shabani. Shaqir Shabani, i cili si përndjekur politik nga viti 1985 jeton në Francë është themelues i Shoqatës kulturore “Rugova”, si dhe themelues i shkollave për mësim në gjuhën shqipe në shumë qytete të Francës.

Ai pos aktiviteteve tjera në mbështetje të mijëra mërgimtarëve për sistemim në Francë si dhe inicimin e shumë aksioneve humanitare ndihmë vendlindjes, ka qenë ura lidhëse mes institucioneve të Kosovës si para ashtu edhe pas luftës me institucionet franceze dhe zvicerane. Krahas shumë çmimeve dhe mirënjohjeve të pranuara nga institucionet e Kosovës, për gjithë këtë kontribut është nderuar edhe me çmimin prestigjioz ndërkombëtar për paqe dhe humanizëm “Riqard Holbruk”./rajonipress/