Haliti kërkon më shumë investime për Rajonin e Lindjes në takimin për themelimin e Qendrës për Zhvillim Rajonal

Viti – Kryetari i Komunës së Vitisë, Sokol Haliti, ka marrë pjesë në takimin koordinues të organizuar nga Ministria e Zhvillimit Rajonal, ku u diskutua procesi i themelimit dhe funksionalizimit të Qendrës për Zhvillim Rajonal Lindje, një mekanizëm i ri që synon të nxisë zhvillimin ekonomik dhe bashkëpunimin ndërkomunal në nivel rajonal.

Takimi mblodhi përfaqësues të institucioneve qendrore dhe lokale, të cilët shqyrtuan transformimin e Agjencive për Zhvillim Rajonal në përputhje me rregulloret e reja në fuqi. Në kuadër të këtij procesi parashihet krijimi i shtatë qendrave rajonale të zhvillimit, me qëllim koordinimin më efikas të projekteve, tërheqjen e investimeve dhe sigurimin e një zhvillimi më të balancuar ndërmjet rajoneve të vendit.

Duke përfaqësuar kryetarët e komunave të Rajonit të Lindjes në panelin kryesor të diskutimit, Haliti shprehu gatishmërinë për bashkëpunim të ngushtë me institucionet qendrore dhe komunat e rajonit për funksionalizimin e kësaj qendre, duke theksuar se koordinimi institucional është kyç për realizimin e projekteve zhvillimore.

Me këtë rast, ai ngriti edhe çështjen e shpërndarjes së investimeve publike, duke kërkuar që Rajoni i Lindjes, përfshirë Komunën e Vitisë, të trajtohet në mënyrë më të drejtë në planifikimin dhe financimin e projekteve strategjike.

Sipas Halitit, ky rajon për një periudhë të gjatë ka qenë nën nivelin e investimeve qendrore, ndërsa një qasje më e balancuar do të ndikonte drejtpërdrejt në zhvillimin ekonomik, krijimin e vendeve të reja të punës, përmirësimin e infrastrukturës dhe rritjen e mirëqenies së qytetarëve.

Themelimi i Qendrës për Zhvillim Rajonal Lindje pritet të krijojë një platformë të re bashkëpunimi ndërmjet komunave dhe institucioneve qendrore, me synim koordinimin më efikas të projekteve zhvillimore dhe rritjen e mundësive për financim të iniciativave që kontribuojnë në zhvillimin e qëndrueshëm të rajonit./rajonipress/