Haliti inspektoi punimet në rrugën Stubëll – Stanqiq, një investim me rëndësi të veçantë për zhvillimin e Karadakut

Viti – Kryetari i Komunës së Vitisë, Sokol Haliti, ka qëndruar sot në terren për të inspektuar nga afër ecurinë e punimeve në projektin e ndërtimit të rrugës Stubëll – Stanqiq, një investim strategjik që pritet të sjellë ndryshime të rëndësishme në infrastrukturën rrugore dhe zhvillimin e zonës së Karadakut.

Gjatë vizitës, kryetari Haliti u takua me banorët e zonës, përfaqësuesit e fshatrave dhe zyrtarët komunalë, me të cilët diskutoi për dinamikën e punimeve dhe rëndësinë që ky projekt ka për banorët e kësaj treve. Ai theksoi se punimet po zhvillohen sipas planit dhe se Komuna e Vitisë mbetet e përkushtuar që projekti të realizohet me cilësi të lartë dhe brenda afateve të parapara.

Rruga Stubëll – Stanqiq është një ndër projektet më të rëndësishme infrastrukturore të viteve të fundit për këtë pjesë të komunës. Me përfundimin e saj do të përmirësohet ndjeshëm qarkullimi, do të forcohet lidhja ndërmjet Stubllës, Vernakollës, Llokmës dhe Stanqiqit, si dhe do të krijohen lidhje më të shpejta drejt Gjilanit dhe Kumanovës.

Ky investim pritet të ndikojë drejtpërdrejt në zhvillimin ekonomik, bujqësor dhe turistik të zonës, duke lehtësuar lëvizjen e qytetarëve dhe duke krijuar perspektivë të re për banorët e Karadakut.

Haliti ritheksoi se investimet në infrastrukturën rrugore mbeten ndër prioritetet kryesore të Komunës së Vitisë, me synim përmirësimin e cilësisë së jetës së qytetarëve dhe krijimin e kushteve për zhvillim të qëndrueshëm në çdo lokalitet të komunës./rajonipress/