Haliti inkurajon dhe premton mbështetje për futbollistët e rinj vitias

Viti – Gjashtë futbollistë të rinj të grup moshës 13-14 vjeçare nga Vitia, janë kthyer nga Gjermania ku kanë qëndruar për 7 ditë, me qëllim të testimit të talenteve të rinj nga menaxherët e futbollit gjerman. Me rastin e kthimit të tyre, kryetari i komunës Sokol Haliti, ka organizuar një pritje me që rast edhe i ka inkurajuar ata për të vazhduar më tej, drejt sukseseve të reja.

Kryetari Haliti është shprehur se futbollistët e rinj, talentet e rinj, do ta kenë përkrahjen e vazhdueshme të Institucioneve komunale të Vitisë. “Juve ju mbetët të vazhdoni përkushtimin dhe të tregoni rezultate, e ne si Institucione do të jemi të angazhuar që të mbështesim dhe të ecim përpara. Është kënaqësi kur dëgjoj për rezultatet e mira që keni arritur gjatë qëndrimit tuaj atje, prandaj edhe shpresoj shumë edhe në rezultate pozitive të arrini pas vlerësimit që iu është bërë atje nga ekspertët e futbollit gjerman’, tha kryetari Haliti.

Trajneri i futbollit për grup moshat e reja Sylejman Hajdini, ka njoftuar se gjatë 7 ditë qëndrimi në Bon, Hotenhaim, Voslburg e qytete të tjera, kanë zhvilluar 4 ndeshje dhe të gjitha i kanë përfunduar me rezultat pozitiv.

Ai ka bërë të ditur se këta 6 futbollistë të rinj, ishin përzgjedhur muaj më parë në kampingun e organizuar nga shkolla e futbollit “Ardhmëria” nga Ferizaj.

Gjithashtu ka njoftuar për interesimin tejet të madh të menaxherëve të futbollit gjerman, për talentet e rinj nga Kosova.

Një grup tjetër i futbollistëve të rinj të grup moshës 12-13 vjeçare, do të udhëtojnë më 24 nëntor në po të njëjtat qytete të Gjermanisë me qëllim të testimit të talenteve të rinj./rajonipress/